NCDC ta faɗaɗa matakan da take ɗauka na tantance lafiyar matafiya bayan gano cutar Ebola a Abuja Hukumar Kula da Daƙile Cututtuka Masu Yaɗuwar ta Najeriya (NCDC) ta faɗaɗa sharaɗin cike fom ɗin bayyana matakin lafiya ga matafiya masu shigowa ƙasar daga ƙasashen waje bayan tabbatar da ɓullar cutar Ebola a Babban Birnin Tarayya Abuja. Daraktan-janar na hukumar, Jide Idris, ne ya bayyana hakan yayin wani taron manema labarai a Abuja a ranar Lahadi. Mista Idris ya ce da farko hukumar ta sanya sharaɗin ga dukkan matafiya masu shigowa Najeriya daga ƙasashen waje, amma daga baya ta taƙaita shi ga waɗanda suka fito daga wasu ƙasashen da ake alaƙantawa da ɓarkewar cutar Ebola, ciki har da Jamhuriyar Dimokuraɗiyyar Kongo (DRC) da Uganda. “Amma bayan ɓullar cutar, mun sauya wannan mataki,” ya faɗa. Ya ce NCDC ta aika da sanarwar gargaɗi ga Hukumar Kula da Filayen Jiragen Sama ta Tarayya (FAAN) da Hukumar Kula da Sufurin Jiragen Sama ta Najeriya (NCAA), kuma tana jiran ƙarin umarni da za su jagoranci aiwatar da matakan tare da kamfanonin jiragen sama. Tantance matafiya a filayen jiragin sama Idris ya ce matakan shirin tunkarar cutar a Najeriya sun fi mayar da hankali kan manyan filayen jiragen sama na ƙasa da ƙasa guda biyar da ke Legas, Abuja, Enugu, Kano da Fatakwal. Ya ce jami’an kula da lafiyar matafiya a mashigai (Port Health Services) suna aiki tare da ma’aikatan filayen jiragen sama, jami’an shige da fice da na kwastam domin ƙarfafa shiri da tantance matafiya a wuraren da mutane ke shigowa ƙasar. A cewarsa, NCDC na buƙatar haɗin guiwa da hukumomin kula da harkokin jiragen sama saboda ba ita ce ke da ikon gudanar da ayyukan filayen jiragen sama kai tsaye ba. Ya ce hukumomin suna aiki tare domin aiwatar da matakan da suka dace, yayin da jami’an shige da fice da na kwastam ke taka rawa a kan iyakokin ƙasar. Idris ya kuma amince cewa ana fuskantar matsalolin gudanar da aiki a filin jirgin saman Legas sakamakon ayyukan gine-ginen da ake gudanarwa a wurin. Ya ce NCDC za ta tattauna da FAAN da NCAA domin magance matsalolin da ke kawo cikas ga ayyukan jami’an kula da lafiyar matafiya. Ya ƙara da cewa shiga wuraren filayen jiragen saman da aka killace saboda tsaro dole ne ya bi ƙa’idojin tsaro da aka shimfiɗa. Matakan yaƙi da cutar Ebola Waɗannan sabbin matakan tantance matafiya na daga cikin matakan da Najeriya ke ɗauka bayan tabbatar da ɓullar cutar Ebola mai nau’in Bundibugyo a Abuja a ranar 20 ga watan Oktoba. Kamar yadda PREMIUM TIMES ta ruwaito, wadda ta kamu da cutar ‘yar ƙasar Uganda ce mai shekaru 42, wadda ta shigo Najeriya daga Uganda a ranar 3 ga watan Oktoba. Ta fara nuna alamun cutar ce a ranar 6 ga Oktoba, sannan ta je asibiti kafin daga bisani aka tabbatar da cewa tana ɗauke da cutar. A taron manema labarai na a ranar Lahadi, Idris ya ce hukumomin lafiya sun gano mutum 53 da suka yi mu’amala da majinyaciyar. Ya ce mutum 44 daga cikinsu suna da alaƙa da cibiyar lafiya da aka yi mata magani, yayin da sauran mutum tara suka haɗa da ‘yan gidanta da wasu mutanen da suka yi hulɗa da ita a wata cibiyar lafiya da kuma mambobin tawagar hukumar lafiya ta FCT da suka tattara samfurin gwajin cutar. Ya ce ana ci gaba da aikin gano mutanen da suka yi hulɗa da majinyaciyar tare da sanya ido a kansu. Jami’an lafiya za su ci gaba da bibiyar waɗannan mutane na tsawon kwanaki 21, wanda shi ne mafi tsawon lokacin da alamun cutar Ebola za su iya ɗauka kafin su bayyana, domin gano duk wanda zai nuna alamun kamuwa da cutar. Idris ya buƙaci ‘yan Najeriya da aka gano sun yi hulɗa da majinyaciyar su ba jami’an lafiya haɗin kai. Ya jaddada cewa gano mutum a matsayin wanda ya yi hulɗa da mai cutar ba yana nufin shi ma ya kamu da ita ba ne. NCDC na kuma ƙarfafa matakan ba da kariya da shawo kan yaɗuwar cututtuka a cibiyoyin lafiya, inganta ɗakunan gwaje-gwaje da kuma wayar da kan jama’a domin yaƙi da jita-jita da bayanan ƙarya. Hukumar ta buƙaci ‘yan Najeriya su riƙa neman bayanai daga ingantattun majiyoyin lafiya da aka amince da su, tare da ba da haɗin kai ga matakan yaƙi da cutar yayin da ake ci gaba da bincike.
Daraktan-janar na hukumar, Jide Idris, ne ya bayyana hakan yayin wani taron manema labarai a Abuja a ranar Lahadi
Read moreDetails
Yawan adadin iskar gas ɗin da Najeriya ke samarwa ya ƙaru sosai sama da wanda take samarwa a shekarar 2023
A nasa jawabin, babban jami'in gudanarwa na PI-CNG & EV, Tosin Coker, ya bayyana muhimmancin CNG da wajen rage kuɗin...
Read moreDetails
Tinubu ya gana da Jakadan Saudiyya bayan sallar Juma’a a Abuja
Fadar Shugaban Ƙasa ta bayyana cewa tattaunawar ta nuna irin kyakkyawar dangantakar da ke tsakanin ƙasashen biyu da kuma
Read moreDetails
