MAFITA GA BUHARI: Ka magance matsalar tsaro, ka daina kitsa wa masu sukar ka tuggu, gadar-zare da kutunguila -Gamayyar Limaman Katolika

0

Hadaddiyar Kungiyar Manyan Limaman Darikar Katolika na Najeriya (CBCN), sun shawarci Shugaba Muhammadu Buhari ya daina bata lokaci, kuzari ko dukiya ko shirya duk wata farfaganda a kan shugabannin addinan da ba su gamsu da irin kokarin da ya ke yi a kan matsalar tsaro ba.

Cikin wata takardar bayan taro da Shugaban CBCN na Kasa, Augustine Akubeze ya sa wa hannu a ranar Alhamis, ya bayyana cewa furucin da Hukumar SSS da Fadar Shugaban Kasa su ka yi, cewa wasu na kokarin shirya tsige Shugaba Buhari, ba wani abu ba ne sai hankoro da hakilon da Gwamnatin Tarayya ke yi domin ta shirya wa masu sukar gwamnati wani ruggu ko gadar-zare kan duk wanda ke sukar gwamnatin Buhari.

“Dimokradiyyar Najeriya ta kowa da kowa ce, har da wanda bai taba mallakar katin shaidar wata jam’iyya ba. Kowa na da ‘yancin fadar ra’ayin sa.

“Ya kamata Shugaban Kasa ya koyi darasin sauraren kowane dan Najeriya. Mai goyon bayan sa da dan adawa, na ciki ko wanda ke wajen Najeriya, duk na sa ne.

“Duk mai sukar gwamnati ba ya na yi don APC ta kasa nasara ba, ya na yi don Najeriya ta dore, ta yi nasara.” Inji su.

“Kuma gaskiyar magana akwai matsalar tsaro a kasan nan, wadda kowa ya san da ita. Wannan matsalar ce ya kamata ka tashi tsaye ka magance”

Kalaman CBCN sun zo ne bayan SSS da Fadar Shugaban Kasa sun yi gargadin akwai masu kokarin ganin sun kayar da gwamnatin Buhari ko da da fatar baki ne.

Sai da Manyan Limaman na Darikar Roman Katolika, sun ce ba su goyon bayan tsige Buhari ko juyin mulki, amma dai wajibin shugaban ne ya tashi tsaye ya magance gagarimar matsalar rashin tsaron da ake fama da shi a fadin kasar nan.

PREMIUM TIMES ta wallafa gargadin Hukumar Sojojin Najeriya ga masu mafarkin a yi juyin mulki a kasar nan.

Hedikwatar Tsaro ta Sojojin Najeriya ta yi kakkausan gargadi kan masu shela, fata ko mafarkin soja su kwace mulki a kasar nan.

Cikin wata sanarwa da Kakakin Yada Labarai na Hedikwatar Tsaro, Burgediya Janar Onyema Nwachukwu ya fitar tare da sa mata hannu, ya ce ‘yan siyasa da sojojin Najeriya su guji kalaman yayata juyin mulki, wadanda ka iya zamo masu ‘baki shi kan yanka wuya’.

“Sononjn Najeriya su na masu biyayya da mubayi’a ga wannan Gwamnatin Dimokradiyya karkashin Babban Kwamandan Askarawan Najeriya, Shugaba Muhammadu Buhari.

“Sojojin Najeriya za su ci gaba da kasancewa a karkashin mulkin dimokradiyya bisa tsarin Dokokin Kasa na 1999. Za a hukunta duk wani jami’in soja ko farar hular da aka kama ya na da ajanda ko watsa ajandar juyin mulki a kasar nan, a yi masa hukunci mai tsanani.”

Wannan sanarwa ta fito ne bayan da wani babban lauya a kasar nan ya yi kira da Shugaba Buhari ya mika wa sojoji ragamar mulki, ganin yadda matsalar tsaro ke neman ta zame wa kasar nan karfen-kafa.

Su ma Jami’an SSS sun gargadi masu furta munanan kalaman da ka iya haddasa fitina su daina.

Cikin wani labari da PREMIUM TIMES HAUSA ta wallafa a ranar Litinin, Hukumar ‘Yan Sandan Leken Asiri ta Kasa (SSS ko DSS) ta fitar da sanarwar kakkausan gargadi ga musamman manyan mutane masu furta munanan kalaman da ka iya haddada tarzoma da dagulewar zaman lafiya a kasar nan.

Sanarwar da Kakakin SSS, Peter Afunanya ya fitar s ranar Litinin, ta zo ne bayan babban fasto Ejike Mbaka ya nemi a tsige Shugaban Kasa Muhamamdu Buhari, saboda abin da ya kira lusarancin Buhari wajen kasa magance matsalar tsaro a kasar nan.

Sannan kuma sanarwar ta zo kwanaki bayan da SSS su ka tsare Usman Bugaje tsawon sa’o’i takwas su na yi masa tambayoyi, bayan ya caccaki Shugaba Buhari a wata hira da aka yi da shi a Gidan Talbijin na AIT.

“Wannan gargadi ya na magana ne musamman ga masu kiran jama’a su fito su nuna wa gwamnati fushin su, ko masu kiran a canja gwamnati da karfin tsiya, domin su na yi da nufi da niyyar tarwatsa kasar nan.”

Sai dai kuma har yau SSS ba su gayyaci gogarman ‘yan iskan yankin Kudu maso Yamma, Sunday Igboho ba, wanda ya rika jan zugar dandazon matasa ana banka wa rugagen Fulani wuta.

SSS sun ce kowa na da ‘yancin fadin ra’ayin sa, amma doka ta haramta furta kalaman da za su iya haddasa tashin hankali.

Yayin da Fadar Shugaban Kasa ta ce Mbaka ya ragargaji Buhari saboda haushin ya nemi kwangila bai samu ba, ita ma APC ta ragargaji babban fasto Mbaka don ya ce Buhari ya gaza, ya sauka ko a tsige shi.

Jam’iyyar APC ta ragargaji babban limamin Kirista, Ejike Mbaka, wanda bayan ya shafe shekaru ya na goyon bayan Shugaba Muhamamdu Buhari, a wannan karon kuma ya kware masa baya, ya ce ba ya iya samar da tsaro a Najeriya, don haka ya sauka kawai.

APC ta ce kalaman da Mbaka ya yi amfani da su sun yi tsaurin da za su iya haddasa tarzoma a kassr nan.

Kakakin APC Yekini Nabena, ya yi barazanar kai karar Mbaka a Babban Cocin Katolika, idan ya ci gaba gaba da kinkimo danyar magana ya na dankara wa Gwamnatin Tarayya.

Mbaka wanda shi ne Shugaban Cocin Adoration Ministry da ke Enugu, kwanan nan ya yi kira ga Majalisar Tarayya ta tsige Shugaba Buhari idan ya ki sauka saboda ya kasa samar da tsaro a kasar nan.

Mbaka dai ya yi wannan furuci a cocin sa, inda ya yi kira ga fadar shugaban Kasa ta gaggauta kawo karshen matsalar tsaron da ta addabi kasar nan.

Yekini Nabena ya ce kamata ya yi Mbaka ya maida hankalin da wajen ibada a cocin sa, maimakon ya rika tsoma baki cikin siyasa, wadda babu abin da ya sani a cikin ta ko a wajen ta.

Ya kalubalanci Mbaka ya yi amfani fa cocin sa wajen yin addu’o’in neman zaman lafiya a kasar nan.

Ya nemi Mbaka ya yi koyi da Yesu Almasihu, wanda ya ce ya bi hukuma sau da kafa a rayuwar sa, har zakka ya rika biya.

Ya nemi Mbaka ya maida hankali a coci, ya kyale ‘yan siyasa su yi siyasar su.

Share.

game da Author