Batun wai Kamfanin Opay na baiwa ‘Yan Najeriya Na’urorin POS Kyauta ba Gaskiya ba ne – Bincike DUBAWA

A cikin kwanakinnan ne wani mai suna Atoshu Elias ya shiga wani shafi a Facebook wanda ake kira “NIGERIA POLICE FORCE ALONE” inda ya sanar cewa kamfanin Opay na bayar da na’urorin POS kyauta hade da ma alkawarin yin rajista kyauta sannan ya kuma bukaci duk wadanda ke sha’awa da su rubuta hakan a karkashin labarin tare da lambar wayar tarhonsu da inda suke zama.

Ga abin da ya fada a sanarwar ta sa: OPAY NA BAYAR DA NA’URAR POS KYAUTA, DUK MAI SHA’AWA YA RUBUTA LAMBAR WAYA DA UNGUWA, RAJISTA KYAUTA NE.”

Ba tare da jinkiri ba ba, mutane 60 suka rubuta bayanansu a karkashin sanarwar.

Opay kamfanin dandali ne na samar da kudi a hannu inda kwastamomi ke iya ajiye kudi ko cirewa a duk inda su ke so ba sai sun je banki ba.

Kamar yadda yake rubuce a shafin kamfanin, babban bankin Najeriya ne ya ba shi lasisi kuma ana iya samun shi ko’ina a Najeriya tun bayar da aka kirkiro kamfanin a shekarar 2018.

Yanzu da amfani da POS ya zama babban hanyar samun kudaden shiga a Najeriya. To sai dai DUBAWA ta gano cewa masu yaudara ma kan yi amfani da irin wadannan hanyoyin wajen zambatar mutanen da ba su ji ba basu gani ba. Wannan ne ya sa DUBAWA ta ga cewa ya dace a tantance gaskiyar lamarin.

Tantancewa

Da farko DUBAWA ta duba shafin Facebook na kamfanin Opay inda ta gano cewa babu wani bayanin da ke da alaka da wannan batun. Haka nan kuma ta kara da duba shafin kamfanin inda nan ma babu wani abun da ke bayanin cewa kamfanin na kyautar da wani abu.

Daga nan ne DUBAWA ta tura sakon email zuwa ga manejan sadarwar kamfanin Mr. Hanson Olorunfemi, wanda ya tabbatar cewa lallai ba da dadewan nan ba ya bai wa wadansu kananan ‘yan kasuwar da ke shirin amfani da na’urorin kananan na’urori, wadanda ake kira mini POS. Mr. Olorunfemi ya ce sun bayar da su ne kyauta ga duk wadanda ke tunanin amfani da na’urar a sana’o’insu nan gaba a fadin kasar.

Sai dai ya ce wa’adin yin hakan ya riga ya wuce tun daga makon farko na watan Yulin 2022.

“Wanda ke da sha’awar na iya sauke manhajan Opay sa’anan ya tambaya a ba shi na’urar. Daga nan ne za’a hada shi da wanda zai bude mi shi layin gudanar hadahadar kudi.”

A Karshe

Binciken mu ya nuna Opay ba ya bayar da kyautar na’urorin POS a yanzu haka. Idan kaga irin wannan sanarwa a shafukan yanar gizo ka fece tunda wuri, yaurada ce ba gaskiya bane. Wanda suka rarraba a baya ma an gama wannan tsarin ko kuma muce shiri domin masu bukata tuntuni.