Yadda iyaye na su ka yi hijira zuwa Jihar Adamawa – Atiku Abubakar

Tsohon Mataimakin Shugaban Ƙasa Atiku Abubakar ya bayyana yadda aka haife shi a Jihar Adamawa. Ya ce iyayen sa ƙaura su ka yi zuwa jihar Adamawa.

Atiku ya ce kowa ya san Fulani masu kiwon shanu sun bazu ko ina a faɗin Afirka.

Haka ya bayyana a Jigawa, lokacin da ya je tallata kan sa wurin wakilan masu zaɓen ‘yan takarar PDP a jihar, makonni biyu kafin zaɓen fidda-gwanin PDP da za’a yi a Abuja.

Wasu ‘yan APC sun daɗe su na yi wa Atiku yarfen cewa ba a Najeriya aka haife shi ba, don haka bai cancanci zama shugaban ƙasar Najeriya ba.

Sun yi wannan iƙirarin wurin Kotun Ɗaukaka Ƙarar Zaɓe a 2019, zaɓen da APC ta kayar da PDP wadda Atiku ne ya tsaya mata takara.

“Zuwa na Jigawa ni gida ce, saboda wani mutum mai suna Adamu Dutse ya bar nan garin Dutse, a Jigawa tare da matar sa mai suna ‘Yar Malam.

“Malam Adamu Dutse da ‘Yar Malam sun yi ƙaura zuwa Adamawa inda aka haife ni.”

Haka Atiku ya shaida wa manema labarai a gidan Sule Lamiɗo, lokacin da ya je ganawa da masu zaɓen ‘yan takarar PDP.

Ya gana da wakilan masu zaɓen ne a sakatariyar PDP a Jihar Jigawa da ke Dutse.

Ya ce har yanzu iyalan gidan su ke kula da masallaci da kuma limanci a garin Jigawar Sarki, kuma ana kiran gidan Gidan Malamai.”

Wannan kaɗan ne daga labarin tarihi na. Don haka ni ina kallon kaina tamkar na zo gida, ina na zo Jigawa.” Inji Atiku.

Ya ce ya je Jigawa ne ba don neman ƙuri’a daga wakilan zaɓe kaɗai ba. Har ma saboda ƙara ƙarfafa danƙon zumunci.

Ya ce shi da tsohon Gwamna Suke Lamiɗo sun taka muhimmiyar rawa tare da shan gwagwarmayar ganin sun kafa wa dimokraɗiyya nagartaccen ginshiƙi a ƙasar nan.

“To yanzu ma ga mu nan mu na ci gaba da wani ƙoƙarin sake ƙarfafa ta daga ceton da mu ka yi mata a hannun sojoji.”

Da ya ke ganawa da wakilan zaɓen ‘yan takara, Atiku ya ce Allah ya albarkaci Najeriya, amma ta yi rashin shugabanni nagari.

Ya yi addu’ar Allah ya ba ƙasar nan shugabanni nagari.

Ya ce ya gode wa wakilan zaɓen ‘yan takarar PDP na Jigawa kan zaɓen sa da su ka yi a fidda-gwani na 2018. Yanzu ma ya na fata da kuma riƙon su sake zaɓen sa.