Abubuwan da yawancin masu karatu ba su ankara ba su ne, dakatar da batun cire tallafin mai da Gwamantin Shugaba Muhammadu Buhari ta yi, ya na nufi muhimman abubuwa biyar za su faru kan tattalin arziki, kuma su afku a kan masu ƙaramin ƙarfi.
Ciki makon jiya Gwamnatin Tarayya ta janye batun cire tallafin fetur, ta ce sai nan gaba tukunna.
Hakan ya na nufin abubuwa kamar haka:
1. Gwamnatin Tarayya za ta ci gaba da biyan kuɗin tallafin man fetur na Naira 241 a kowace lita. Saboda sai ta yi hakan ne za a iya shan litar fetur naira 165.
2. Idan ta cire tallafin fetur, to lita ɗaya za ta iya komawa har Naira 403.
3. Dakatar da cire tallafin fetur na nufin Najeriya za ta sake narka naira tiriliyan kusan 4 a cikin shekara ɗaya, domin biyan tallafin fetur.
4. A Najeriya kowace shekara a lissafin NNPC ana shan fetur lita tiriliyan 19.535 a kowace shekara, kwatankwacin lita biliyan 1.6 duk wata kenan.
5. Dakatar da cire tallafin fetur ya shafe sabuwar Dokar Fetur wadda Shugaba Muhammadu Buhari ya sa wa hannu watanni uku da suka gaba.
6. A yanzu Buhari ya aika wa Majalisa sanarwar a jingine Sabuwar Dokar Fetur wadda za ta fara aiki cikin Fabrairu. Da farko an maida cewa za ta fara aiki a farkon Yuli, 2022 idan an cire tallafin man fetur a lokacin.
Amma kuma yanzu Shugaban Ƙasa ya nemi dokar a jingine ta, sai nan da watanni 18 za ta fara aiki tukunna.
7. Hakan na nufin Gwamnatin Buhari za ta ci gaba da biyan tallafin fetur har nan da watanni 18, a lokacin da sabuwar gwamnati ta hau mulki kenan.
8. Jingine Dokar Fetur na nufin tilas sai Gwamantin Tarayya ta sake ciwo bashin Naira tiriliyan 2.5, domin a samu abin cike giɓin kuɗaɗen tallafin man fetur.
9. Bankin Bada Lamuni na Duniya (IMF) ya ce kamata ya yi a gaggauta cire tallafin, domin gwamnati ta riƙa yi wa jama’a ayyukan inganta lafiya da bunƙasa fannin ilmi da raya ƙasa.
10. Har yanzu ko maganar gyara matatun Najeriya ma an daina yi, saboda gwamnati ta dogara ne da masana’antar tace ɗanyen mai ta Ɗangote, wadda za a kammala ginin ta a Legas cikin 2022.
Sai an kammala ta ne gwamnati za ta riƙa sayen tataccen fetur a masana’antar da Naira ba da Dola ba.
Yin hakan a cewar Gwamnan Babban Bankin Najeriya shi ne hanya mafi sauƙin rage tsadar fetur a ƙasar nan a nan gaba.
Discussion about this post