Gwamna Badaru Abubakar na Jihar Jigawa ya hau mulki a ƙarƙashin APC a 2015. Ya na cikin gwamnonin da su ka ci albarkacin farin jinin Buhari a guguwar 2015.
A farkon hawan sa, ya bayyana cewa ya gaji basussuka da kuma matsalar wasu ayyukan raya jiha da Gwamnatin PDP wadda ya gada, ta fara amma ba ta kammala ba.
“Wato da na kama mulki, na ga bayanan ayyukan da na gada daga PDP, sai a jiki na na ke jin kamar na tsere kawai.”
Badaru ya ce Naira miliyan 16 kaɗai ya gada daga gwamnatin tarayya. Wato ba a ma san yadda za a iya biyan albashi a lokacin ba kenan.
Gwamnatin Badaru ta yi alƙawarin magance “matsalar tsaro, ilmin zamani da inganta tsarin samar da aikin yi da bunƙasa al’umma.
Akwai kuma barin ruwa mai tsafta, kiwon lafiya, samar wa matasa aiki, tallafa wa mata wajen sana’ar dogaro da kai, rage raɗaɗin talauci ta hanyar bunƙasa aikin gona da sauran su
Shin Badaru ya yi dabarun yin nasara, ko daburcewa ya yi tsawon shekaru takwas.
Taras Da Ɗimbin Bashin Da Ake Bin Jigawa:
A ranar da aka rantsar da Badaru, a 29 Ga Mayu, 2015, ya taras ana bin jihar Jigawa bashin Naira biliyan 110. Wannan adadin kuwa a wancan lokacin kuwa, bashin ya ma haura adadin kasafin Kuɗin jihar. Alhali kuma ya taras da Naira miliyan 16 kaɗai a cikin asusun jihar.
Daga cikin bashin akwai Naira biliyan 13.64 da ‘yan kwangila ke bi, amma ba a biya ba. Sai kuma Naira biliyan 91.6 na bashin kwangiloli wanda an fara, amma ba a kammala ba, har Naira biliyan 91.6.
Daga cikin basussukan, akwai Naira biliyan 1.57 da gwamnatin PDP ta gada daga gwamnatin 1997 zuwa 2007.
Zaɓaɓɓen Gwamna Umar Namadi, wanda za a rantsar ranar Litinin, shi ne Kwamishinan Kuɗi na Gwamna Badaru har tsawon shekaru takwas. Ya ce Gwamnatin Badaru ta kammala ayyukan kuma ta biya ‘yan kwangila kuɗaɗen, ta kuma ƙaddamar da su kafin 2019.
Ƙarancin Kuɗaɗen Shiga Jigawa:
Lokacin da Badaru ya hau mulki a 2015, Naira biliyan 5 kaɗai Jigawa ta karɓa a matsayin kuɗaɗen shigar da aka tara a cikin jihar. Kamar yadda lissafin Hukumar Ƙididdigar Alƙaluman Bayanai ta Ƙasa (NBS).
Jigawa ba ta tara kuɗaɗen haraji na cikin jiha sosai. Domin daga naira biliyan 5 ɗin 2015, a 2019 ma da kyar aka samu naira bilyan 12.9.
Batun bashi kuma ana bin jihar Bashin Naira biliyan 43.52.
Abin Yabo A Jigawa:
Rahoton Kwamitin Miƙa Mulki wanda PREMIUM TIMES ta ga kwafen, ya jinjina wa gwamnatin Badaru wajen samar da ruwa mai tsafta.
Gwamnatin Badaru ta rage yawan mutuwar ƙananan yara, daga yaro 192 cikin 1,000 zuwa 174 cikin 1,000 a 2015. Zuwa 2023 adadin ya koma 95 cikin 1000.
An samu raguwar mata masu mutuwa a wajen haihuwa. Kuma an samu ƙarin yawan mata masu haihuwa asibiti, idan aka kwatanta da 2015 da kuma yanzu a 2023.
Katutun Fatara Da Talauci A Jigawa:
A malejin awon tantagaryar fatara da talauci, wanda Hukumar Ƙididdigar Alƙaluman Bayanai ta Ƙasa (NBS) ta auna da shi a 2022, ta ce mutum miliyan 133 a Najeriya ba su da cin yau ballantana na gobe, sai sun fita sun nema a ranar. Ko su samo, ko ba su samo ba.
Wannan yawan masu fama da talauci ya yi katutu a Jigawa, inda a lissafin 2015 ya nuna kashi 84.3 bisa100 na al’ummar jihar duk matalauta ne.
Har yau dai jiya kamar yau, domin Jigawa na sahun farko na jihohin da su ka fi yawan matalauta a Najeriya.
Discussion about this post