Tsallen-baɗaken da Andy Uba ya yi zuwa cikin jam’iyyar APC ana kusa da fara yaƙin neman zaɓe, ya sa masu nazarin siyasa da dama na ganin cewa zai iya yin nasara a zaɓen Gwamnan Jihar Anambra da aka gudanar a ranar Asabar.
Fitowar sa matsayin ɗan takarar APC da yadda Shugaba Buhari ya karɓe shi a Fadar Shugaban Ƙasa, ya ƙara bai wa kowa mamaki, ganin irin rawar da Uba ya taka wajen ƙoƙarin gurgunta dimokraɗiyya a Jihar Anambra, a 2007, lokacin da ya ke PDP.
Yayin da Andy Uba ya shiga takara cike da buri da tinƙahon ganin zai iya yin nasasa, dukkan ‘yan takardar sun fuskanci ƙarancin fitowar masu jefa ƙuri’ar da aka ce waɗanda suka fito ba su fi kashi 20 bisa 100 na masu rajistar INEC a jihar ba.
Maimakon a ga Andy Uba ya zaburi doki ya karta a guje ya yi wa sauran ‘yan takara fintinkau, sai ya koma sagarabtu da haniniya, maimakon gudu.
Tun tafiya ba ta yi nisa ba, Charles Soludo na APGA ya bi shi har ƙaramar hukumar haihuwar Uba, ya ranƙwala shi da ƙasa.
Charles Soludo wanda ya lashe ƙananan hukumomi 18 cikin 20 da aka bayyana sakamakon su, ya sha kaye a Ƙaramar Hukumar Ogbaru, inda can ne mahaifar Minista Stella Odua.
Sai dai kuma abin mamaki, ɗan takarar jam’iyyar PDP, Valentine Ozigbo ne ya kayar da shi, ba Andy Uba, ɗan takarar APC jam’iyyar su Stella ɗin ba.
Andy Uba ya zo na uku da ƙuri’u da ƙuri’u 43,000 da ‘yan ɗoriya.
Yayin da Ozigbo ya samu ƙuri’u 3,445, Soludo ya samu 3,051.
Tuni dai duk da kurin da Andy Uba ya riƙa yi, Soludo ya tsere masa fintinkau da ƙuri’a kusan 60,000.
Jihar Anambra ita ce jihar ta biyu wajen ƙankantar faɗin ƙasa a Najeriya.
Jihar Legas ce kaɗai ta fi jihar Anambra faɗi.
Soludo: Falken Da Ya Saba Karo Da Kuɗi, Maza Ba Su Iya Zubar Masa Haƙora:
Ba tun yau Charles Chukwuma Soludo ya fara goyayya da gaggan masu kuɗi ba.
Bayan ya zama Gwamnan Babban Bankin Najeriya, CBN cikin 2003, ya na ɗan shekara 43, ya fito da wata doka a cikin 2004, domin ƙarfafa ƙarfin bankunan Najeriya.
Tsarin ‘Consolidated Policy’ da ya fito da shi, ya jaddada cewa daga ƙarshen 2005, tilas jarin kowane banki ya kasance ya kai Naira biliyan 25, maimakon Naira biliyan 2.
Wannan ƙa’ida da ya gindaya, ta kai ga bankunan kasuwanci sun ragu a Najeriya, daga 86 zuwa 25 kaɗai.
Valentine Ozigbo: Gurgun Da Ka Iya Lashe Wa PDP Gasar Tsere Ko Da Ɗingishi:
Duk da Charles Soludo ya tsere wa Valentine Ozigbo na PDP fintinkau, hakan ba ya na nufin ya haƙura kawai ba, domin komai na iya faruwa a zaɓen ‘inkwankulisib’ da za a yi ranar Talata a Ƙaramar Hukumar Ihiala.
An ga irin haka a Jihar Kano, inda APC ta yi jijjige-jijjige da rarume-rarumen rububin ƙuri’un ko ana ha-maza-ha-mata.
Kanan idan Ozigbo ya yi katari al’ummar Ihiala masu rajistar zaɓe suka yi masa ruwan ƙuri’u, to wataƙila labari zai iya shan bamban.
To sai dai kuma cin ‘inkwankulisib’ ga ɗan takarar da aka tsere wa fintinkau da kusan ƙuri’u 50,000, sai mai uwa a gindin murhu, wato ɗan jam’iyya mai mulki.
Shi kuwa Ozigbo, ba ma za a kira shi agola ba, sai dai a kira shi marayan tsuntsu.
