Isra’ila na cigaba da luguden bamabamai a Gaza, ta umarci sojojinta 300,000 su daura damarar yaki gadangada

Isra’la na cigaba da yi wa yankin Gaza luguden bamabamai a cigaba da yaki da ta ke yi da Hamas a yankin Gaza.

Zuwa yanzu rahotanni sun nuna cewa akalla mutum 570 ne Palastinawa suka rasu a harin da suke kaiwa. Yan kasar Isra’ila 800 suka rasu zuwa yanzu.

Sai dai kuma Isra’la ta fusata matuka domin ta umarci dakarunta akalla 300,000 su daura damaran yaki su jira aba su oda su shiga Gaza su fafata da Hamas.

Isra’la ta fusa ta ne bayan yan kungiyar Hamas sun far wa wani garin Yahudawa inda suka kashe mutum sama da 200, sannan suka yi garkuwa da mutane, mata da yara ma su yawan gaske.

Jiragen Isra’ila na ci gaba da luguden wuta a Gaza babu kakkautawa. Haka suma yan Hamas suna ci gaba da harba bamabamai a yankin Isra’ila babu kakkautawa.