Dalilin da ya sa majalisa ba ta tabbatar da El-Rufai a matsayin minista ba – Akpabio

Shugaban majalisar Dattawa ya bayyana cewa majalisar dattawa ba ta tabbatar da tsohon gwamnan Kaduna, Nasir El-Rufai kujerar minista ba saboda wasu dalilai da ke gaban hukumomin tsaro.

Idan ba’ a manta ba majalisa ta tantance El-Rufai domin zama minista a makon jiya.

Sai dai tun a lokacin da ake tantance tsohon gwamnan, ɗan majalisa daga jihar Kogi ya mika wasu takardu kunshe da korafe-korafe a kan sa.

Akpabio ya ce majalisa ba ta tabbatar da shi da wasu da aka tantance su uku, daga jihar Taraba da Jihar Delta saboda wasu korafe-korafe da aka mika game da su a majalisar.

” Muna jiran hukumomin tsaro su wanke su tukunna. Idan suka gama da su sai su miko mana rahoton su wanda da shine za mu tabbatar da su nan gaba.