Hukumar Kare Ingancin Abinci da Magunguna ta Ƙasa (NAFDAC), ta yi ƙarin haske dangane da ruɗanin gano sinadarin da ke haddasa cutar kansa a cikin taliyar Indomi a Malaysia da Taiwan.
A cikin wani taƙaitaccen saƙo da NAFDAC ta aiko wa PREMIUM TIMES, Shugabar Hukumar ta NAFDAC, Farfesa Mojisola Adeyeye ta ce an haramta shigo da kowane nau’in Indomi daga ƙasashen waje.
Ta ce Indomin da ake ci a Taiwan da Malaysia ba ta da rajista a Najeriya, don haka ba a yarda a shigo da ita ba.
Shugabannin kamfanin Dufil Prima Foods Plc, masu yin Indomi a Najeriya kuwa sun ce wadda su ke sarrafawa a nan Najeriya lafiya ƙalau ta ke, babu wani shakku ko tababar ingancin ta.
NAFDAC ta ce ta na ci gaba da gwajin bincike, kuma za ta sanar da sakamakon da ta gano.
PREMIUM TIMES Hausa ta buga labarin cewa Najeriya ta fara bincike, bayan gano sinadarin da ke haddasa cutar kansa a cikin Indomi a Taiwan.
Gaggawar da ƙasashen Malaysia da Taiwan su ka yi na kwashe dukkanin ‘Indomie Special Chicken’ daga kantina da kasuwannin ƙasashen biyu, ya kaɗa hantar Najeriya da sauran ƙasashen duniya.
Ƙasashen biyu sun dakatar da sayarwa da cin nau’in Indomie ɗin biyo bayan gano sinadarin ‘ETHYLENE OXIDE’ mai haddasa cutar kansa a cikin Indomi ɗin.
Cibiyoyin kula da lafiyar abinci da magunguna ta ƙasashen biyu su ka gano sinadarin bayan wani binciken ƙwaƙwaf da su ka gudanar.
Tuni ita ma Najeriya ta zabura, yayin da Hukumar Kula da Ingancin Abinci da Magunguna ta Ƙasa (NAFDAC) za ta fara binciken samfuran Indomi ɗin da ake ci da sayarwa a Najeriya.
NAFDAC ta tabbatar wa PREMIUM TIMES haka a ranar Lahadin nan da safe cewa za ta fara gudanar da binciken domin ganowa da tabbatar da gaskiyar abin da ƙasashen Taiwan da Malaysia su ka ce sun gano.
Sinadarin Da Taiwan Da Malaysia Su Ka Gano A Cikin Indomi:
Ma’aikatar Lafiya a Taipei, babban birnin ƙasar Taiwan ta ce ta gano sinadarin ,’ethylene oxide’ mai haddasa cutar kansa a nau’ukan Indomi biyu, wato Indomie Chicken flavour, a wani gwajin ingancin abincin da su ka yi.
Ta ce sun gano cewa samun sinadarin mai haddasa kansa a jikin mutane da aka yi a cikin Indomie, ya nuna an kauce wa ƙa’ida da sharuɗɗan ingancin abinci kafin a kai shi kasuwa.
Sinadarin Da Malaysia Ta Gano A Cikin Indomi:
Ma’aikatar Lafiya ta Malaysia ta ce ta yi gwaji a samfura 36 na indomi, tun daga 2022, kuma ta gano cewa tabbas akwai sinadarin ‘etheylene oxide’ mai haddasa kansa a jikin ɗan Adam a cikin su.
Sai dai kuma kamfanin Indofoods na ƙasar Indonesia masu yin Indomie sun ƙaryata zargin cewa su na amfani ko akwai sinadarin da ke haddasa kansa a cikin nau’ukan abincin na su.
Sai dai tuni Taiwan da Malaysia sun bada umarnin a janye Indomie daga kantina da kasuwannin ƙasashen biyu.
A Najeriya, Darakta Janar ta NAFDAC, Mojisola Adeyeye, a safiyar Lahadi ɗin nan ta shaida wa PREMIUM TIMES cewa daga ranar Talata mai zuwa za su bazama yin gwaji, wato daga ranar 2 Ga Mayu.
Ta ce tuni jami’an gwaji a hukumar sun shirya tsaf, ta yadda da zarar sun kammala, sannan hukumar za ta yi wa jama’a bayanin abin da ta gano.
Discussion about this post