Baturen Zaɓe na Hukumar INEC da ke Kano ya bayyana Abba Kabiru Yusuf na NNPP Zaɓaɓɓen Gwamnan Kano.
Farfesa Ahmad Ibrahim ya sanar da cewa NNPP ta samu ƙuri’u 1,019,602, yayin da Nasiru Yusuf Gawuna na APC ya tashi da 890,105.
Abba, wanda aka fi sani da Gida-gida, ya kafa tarihi domin shi ne kaɗai zaɓaɓɓen gwamnan da ya samu ƙuri’u miliyan ɗaya a zaɓen 2023 a Najeriya.
Ya samu nasara ce bisa jagorancin Sanata Rabi’u Kwankwaso, jagoran Kwankwasiyya, bayan an kafsa da shi a zaɓen 2019, an kayar da shi da ‘inkwankilusib’ da aka yi a unguwar Gama, inda Nasiru Gawuna ya ke.
Idan za a tuna, a Mazaɓar Gama ce ‘yan sanda su ka kama Nasiru ya na mataimakin Gwamna shi da Garo, lokacin da su ka je su ka kekketa ƙuri’u a zaɓen 2019.
Su ne kuma Gwamna Ganduje ya tsayar ‘yan takarar gwamna da mataimaki a Kano a APC.
Wane Ne Abba Gida-gida:
Zaɓaɓɓen Gwamnan Kano, Abba Yusuf ɗan Gidan Sarautar Kano ne. A wata tattaunawa da aka yi da gogaggen ɗan siyasa kuma mai sharhin siyasar Kano da Najeriya, Bashir Jentile kusa da zaɓe, ya bayyana nasabar Abba a cikin gidan Sarkin Kano kamar haka:
1. “Idan dangin Abba su ka yi masa kara, to ba mai iya kayar da Abba. Tsayar da nasarar sa sai dai Allah.”
2. “Kakaf ɗin ‘yan siyasar Kano babu mai dangin da su ka kai yawan dangin Abba.”
3. “Na san Abba farin sani, saboda ‘yar sa na ke aure. Abba suriki na ne.”
4. “Abba ya yi sa’ar ubangida, wato Rabi’u Kwankwaso, wanda jarimi ne kuma gwarzo wanda duk inda ya sa gaba, to sai fara ya shiga.”
5. “Kwankwaso ya bai wa Abba duk wata damar da zai iya bayarwa don ya yi nasara.”
6. “Abba Ɗan Sarkin Kano Ne, Ga Nasabar Sa:
Kabiru mahaifin Abba ɗan Makwayon Kano Yusuf ne.
Makwayon Kano Yusuf ɗan Malam Bashari ne.
Makam Bashari ɗan Galadiman Kano Yusufu ne, babban ɗan Sarkin Kano Abdullahi Maje Karofi.
Abdullahi Maje Karofi ɗan Sarkin Kano Ibrahim Dabo ne.
Don haka hula biyar ce tsakanin Abba da Sarkin Kano. Ko yau ya zama Sarki ba za a ce bai gada ba. Ba za a yi ƙorafi ba.”
Discussion about this post