Banka wa gidan mawaƙi Dauda Kahutu Rarara a Kano jim kaɗan bayan bayyana sakamakon zaɓen gwamna a Kano, abin tayar da hankali ne.
An banka wa gidan wuta da ke kusa da Sahad Stores, haka an ragargaza ofishin sa wanda ba shi da nisa sosai da gidan na sa, kusa da Zoo Road a Kano.
Tun kafin hakan ta kai ga faruwa, alamomi sun nuna hakan zai iya faruwa, idan aka yi la’akari da hayaniyar da ta taso kafin zaɓe, ranar zaɓe da kuma bayan zaɓe tsakanin Rarara da masu adawa da shi, sakamakon wasu waƙen adawa da kuma saɓanin siyasa da ya shiga tsakanin sa da magoya bayan Kwankwasiyya.
Lamarin ya wuce rigima da ‘yan Kwankwasiyya, ya koma da matasan Kano, musamman lokacin da makusanciyar Rarara, Aishatu Humaira ta yi ‘fostin’ cewa duk masoyin ta ya zaɓe Gawuna, ɗan takarar APC.
Ko ma dai me ya ce ya dawo, Hukumar Tace Finafinai ta Kano ta taimaka wajen kauda idanun wa kan rashin tace waƙoƙin Rarara da ba ta yi, sai dai ta fi maida hankali kan mawaƙan da ke adawa da gwamnatin Kano, ko kuma ‘yan fim masu adawa da gwamnatin Kano.
Rarara ya yi babban kuskure da ya saki waƙa ranar Lahadi, ƙarfe 2 na dare, wadda ya ce bayyana cewa: “Tinubu ya kada Tsula, Gawuna ya kada Abba.” Ya saki waƙar tun kafin Hukumar Zaɓe (INEC) ta bayyana sakamakon zaɓen gwamnan Kano. Wannan kuwa ba ƙaramin ganganci da wauta ba ce, wadda babu mawaƙin da zai yi haka, sai wanda ke jikin gwamnati, domin ya san babu wanda yai cumuimuye shi ya maka shi kurkuku kamar yadda aka yi wa wasu.
Bayan an banka wa gidan Rarara wuta, ‘yan Kwankwasiyya da dama sun fito sun ce babu ruwan su a kai harin, aikin ɓarayi ne, domin su dai su na gidan jagoran su a Miller Road, su na cashewar murnar nasarar zaɓen da Abba ɗan takarar su ya yi.
Akwai buƙatar Hukumar tace finafinai ta riƙa taka wa kowane mawaƙi burki duk kusancin sa da gwamnati. Kuma akwai buƙatar mawaƙan siyasa su riƙa yi wa bakin su linzami. Domin siyasa romon jaɓa ce, ga kitse sannan kuma ga wari.
Ya kamata jami’an tsaro su kama duk wani da ake zargin ya ɗauki doka a hannun sa, kuma a hukunta shi.
Kuma ya kamata Kannywood ta shiga taitayin ta, saboda sun saki harkar fim baki ɗaya, ‘yan fim ɗin su da mawaƙan su sun koma ‘yan jagaliyar ‘yan siyasa.
Discussion about this post