ZAƁEN SHUGABAN ƘASA: Ƙungiyar Ƙwadago, NLC ta umarci ma’aikata su zaɓi Peter Obi

Kwamitin Harkokin Siyasa na Ƙungiyar Ƙwadago ta Ƙasa (NLC), ta umarci ma’aikatan kasar nan su zaɓi Peter Obi na LP a zaɓen shugaban ƙasa.

Haka kuma ta umarce su su zaɓi ‘yan takarar jam’iyyar LP a zaɓen sanata, majalisar wakilai ta ƙasa, gwamnoni da majalisar jiha.

Sakataren kwamiti mai suna Chris Uyot ne ya sanar da wannan umarnin ga ma’aikata a cikin wata sanarwa da ya fitar a ranar Talata.

Tun a cikin 2022 ne dai NLC da takwarar ta TUC su ka bayyana goyon bayan su ga LP.

Uyot ya ce ma’aikata su fito ranar Asabar su yi tururuwar jefa ƙuri’a, sannan kuma su tsaya su tabbatar sun kare ƙuri’un da su ka jefa.

Sai dai kuma kwanaki uku kafin zaɓe tashin hankali a Kudu maso Gabas, yankin da LP ta fi magoya baya, ya yi ƙamari har an bindige ɗan takarar sanatan LP na jihar Enugu.

An bindige ɗan takarar sanatan jam’iyyar Peter Obi a Enugu.

Wasu ‘yan bindigar da ba a san ko su wa ba ne sun bindige ɗan takarar sanatan jam’iyyar LP na Enugu ta Gabas, a yankin Amechi Awkunanaw, cikin Ƙaramar Hukumar Enugu ta Gabas.

An bindige Oyibo Chukwu ne a ranar Laraba, tare da wasu magoya bayan sa biyar waɗanda ke cikin mota ɗaya tare da shi.

Kisan ya faru ne kwanaki uku kafin zaɓen sanatoci, wanda za a yi tare da na shugaban ƙasa a ranar Asabar, 25 ga Fabrairu, 2023.

Shugaban jam’iyyar LP na Jihar Enugu, Casmir Agbo ya tabbatar wa PREMIUM TIMES a ranar Alhamis ɗin nan labarin wannan mummunan kisan gilla.

“E, gaskiya ce an bindige shi. A yanzu haka mu na zaman taron ganawa kan batun na mutuwar ta shi.”

Agbo ya yi zargin cewa kisan ɗan takarar na da alaƙa da siyasa, ba ‘yan bindigar da ba a sani ba ne.

Wata majiya mai kusanci da ɗan takarar da aka bindige ɗin, ya tabbatar wa wannan jaridar cewa tabbas an kashe ɗan takarar.

Ya ce bayan sun kashe shi kuma sun ƙone gasar sa.

“Babbar matsalar ita ce da ba shi da jami’an tsaro masu kare lafiyar sa. Haka ya ke kamfen ko’ina ba jami’an tsaro masu gadi ko kare lafiyar sa.”

Kakakin Rundunar ‘Yan Sandan Enugu, Daniel Ndukwe ya tabbatar da labarin kisan, amma kuma ya ce a saurare shi sai an jima zai yi cikakken bayani.

Ba wannan ne karo na farko da aka kai wa ‘yan LP hari a lokacin kamfen ba.

A ranar 4 Ga Satumba, ‘yan bindiga sun kai wa mambobin LP hari a lokacin da su ke taro a Karamar Hukumar Awgu.

Haka ma a cikin Disamba sun kai irin wannan hari a jihar Imo.

Sai dai kuma wasu mambobin LP na zargin cewa wasu jam’iyyu ne ke ɗaukar nauyin hare-haren saboda haushin karɓuwa da farin jinin da LP ta yi.