Tsohon Shugaban Ƙasa Olusegun Obasanjo, ya bayyana cewa duk da ya na goyon bayan Peter Obi na LP ya lashe zaɓen shugaban ƙasa a 2023, ba zai shiga cikin rundunar kamfen ɗin yaƙin neman zaɓen sa ba.
A ranar Alhamis ce ya ce ba zai taya shi zaɓe ba, amma na yi amfani da ɗimbin hikima da darussan da na koya ina ɗora al’amurra bisa turbar da ta dace.
“Ni fa ba na goyon bayan kowace jam’iyyya. Kuma ba zan taya kowane ɗan takara kamfen ba. Na dai bayyana ra’ayi na ne, na faɗi wanda na ke ganin shi ne mafi alheri ga Najeriya.”
Kwana biyu bayan Obasanjo ya ce Peter Obi na LP ne mafi alheri ga Najeriya, Fadar Shugaban Ƙasa ta fito gadan-gadan ta ce ‘Obasanjo ‘ba dattijon arziki ba ne’.
Fadar Shugaban Ƙasa ta bayyana cewa irin kakkausar sukar da tsohon Shugaban Ƙasa Olusegun Obasanjo ke wa Gwamnatin Shugaba Muhammadu Buhari, ba wani abu ba ne sai nifaƙa, son rai da ganin-ƙyashi da kuma ɓacin ran da ya ke kwana da tashi da shi a cikin zuciyar sa.
Fadar ta ce halayyar da tsohon shugaban ke nunawa kan Buhari, hali ne na dattijon da ba shi da dattako a zuciyar sa.
Haka dai Fadar Shugaban Ƙasa ta yi wa Obasanjo wannan raddi a cikin wata sanarwar da Kakakin Yaɗa Labaran Shugaban Ƙasa, Garba Shehu ya sa wa hannu a ranar Litinin.
Garba Shehu ya yi wannan raddi ne dangane da wasiƙar da Obasanjo ya rubuta a ranar 31 Ga Disamba, 2022, inda a cikin wasiƙar ya nuna goyon bayan sa ga takarar Peter Obi, wanda ke takarar shugaban ƙasa a ƙarƙashin jam’iyyar LP.
Wannan goyon baya da Obasanjo ya nuna wa Obi, ya janyo mayar masa raddi daga APC da PDP, sai kuma na baya-bayan nan shi ne wannan da Fadar Shugaban Ƙasa ta yi masa.
Ba goyon bayan Peter Obi kaɗai Obasanjo ya yi a cikin wasiƙar ta sa ba, abin da ya janyo har Fadar Shugaban Ƙasa ta yi masa raddi, saboda ya ce shekaru bakwai da rabi na mulkin Buhari sun zama alaƙaƙai ga ‘yan Najeriya.
Obasanjo cewa ya yi mulkin Buhari ya kasance wa ‘yan Najeriya tamkar “wanda ya yi tsalle ne daga kaskon suya ya faɗa cikin wuta. Saboda wannan mulki ya zama tamkar rayuwar jahannama ce a duniya.” Inji Obasanjo.
Discussion about this post