‘Yan ta’adda sun saki ƙananan yaran da su ka kama

Rundunar ‘Yan Sandan Jihar Katsina ta bayyana labarin cewa ‘yan ta’addar da su ka yi garkuwa da ƙananan yara a wata gona a Katsina, sun sake su.

Cikin wata sanarwa da ya fitar, Kakakin Yaɗa Labaran ‘Yan Sandan Katsina, ya ce an saki yaran 21 waɗanda aka kama tare da wasu magidanta a wata gona a Ƙaramar Hukumar Faskari, kusa da Funtua.

Ya ce yaran su 21, akwai mata 17 sai maza huɗu.

Bai bayyana sunan mai gonar ba, kuma bai bayyana ko an biya diyya ko ba a biya ba.

Su dai ‘yan bindigar sun ce ba za su sake su ba har sai an biya diyyar Naira miliyan 30, ko kuma an haɗa su da mai gonar, wanda aka ce masu attajiri ne mazaunin Funtua.

PREMIUM TIMES HAUSA ta bada labarin yadda ‘yan ta’adda sun arce da ƙananan yara 39 daga wata gona a Katsina.

‘Yan ta’addar da su ka kama ƙananan yara 39 a Katsina sun nemi a biya su Naira miliyan 30 kafin su sake su.

Sun bayyana cewa su na so su yi magana da mai gonar da su ka kama yaran a gonar sa.

Sun yi alƙawarin ba za su saki yaran ba, har sai an biya masu buƙatar su ta biyan su fansar Naira miliyan 30.

An kama yaran a wata gona a Mairuwa, cikin Ƙaramar Hukumar Faskari, amma kusa da Funtuwa.

Wasu daga cikin yaran ‘yan cikin ƙauyukan Funtuwa ne, wasu kuma daga ƙauyukan ƙaramar hukumar Faskari.

PREMIUM TIMES HAUSA ta ji daga majiya mai tushe cewa ‘yan ta’addar sun mamaye gonar a ranar Asabar da rana tsaka, su ka kwashi masu aikin gona sama da 40. Cikin waɗanda aka tafi da su ɗin, yara 39 ƙanana ne, kuma sun kasa tserewa.

Majiyar ta ce maharan sun tuntuɓi wasu daga cikin iyayen yaran, inda su ka nemi sai an biya su naira milyan 30 kafin su sake su.

“Mai gonar bayan nan lokacin da aka yi awon-gaba da yaran, sai wani mai kula da gonar mutum ɗaya. Sun kira iyayen yaran su ka ce masu ba za su karɓi ƙasa da abin da su ka nemi a biya su ba. Ko kuma a haɗa su da mai gonar.

“Sun ce sun yi ƙwaƙƙwaran bincike sun gano cewa mai gonar attajiri ne. Saboda haka yanzu sun ce lallai sai an haɗa su da mai gonar.

Kakakin Yaɗa Labaran ‘Yan Sandan Katsina ya ce su na sane da lamarin.