Dakarun sojojin Najeriya sun kashe kasurgumin dan bindiga da ya addabi dazukan yankin jihar Kaduna mai suna Dogo Maikasuwa da aka fi sani da Dogo Millionaire.
Kafin ya mutu Dogo Millionaire da ‘yan barandan sa sun dade suna addabar mazaunan karamar hukumar Chikun.
Kwamishinan tsaron jiihar, Samuel Aruwan bayyana yadda aka kashe dan bindigan a lokacin da yake ganawa da manema labaraia garin Kaduna.
Aruwan ya ce “Dogo Maikasuwa wanda aka fi sani da Dogo Millionaire ya dade yana kai wa mazaunan karamar hukumar Chikun da Kajuru hari tare da yin garkuwa da mutanen kauyukan yankin.
” Shi dai wannan dan ta’adda, yaka saka kayan sarki ne sannan ya rike bindiga kirar AK 47 a duk lokacin da zai fita aikin kisa da garkuwa da mutane kuma yayi kaurin suna matuka. Sannan kuma shi tsarin sa shine ko ka biya kudin fansa kamar yadda ya bukata ko kuma ya kashe ka koda ko rabi ne aka biya ko kuma an biya kudin bai cika ba.
A farmakin da sojoji suka kai wa gungun yan bindigan da har suka yi nasarar kashe Dogo, da yawa daga cikin ‘yan barandan sa sun arce da rauni a jikin su, wanda aka ji labari dag baya cewa wasun su sun mutu.
Gwamnan jihar Kaduna ya jinjina wa nasarar da sojoji suka samu sannan ya yi addu’ar Allah ya ci gaba da basu nasara kan ‘yan bindiga.
Discussion about this post