Yayin da jami’o’in Najeriya su ka shafe watanni bakwai a rufe cikin 2021, rahoton Ofishin Jakadancin Amurka da ke Najeriya ya tabbatar da cewa ɗalibai 14,438 ne su ka fice zuwa neman ilmi a manyan makarantun Amurka, a zangon karatu na 2021/2022.
Rahoton ya nuna cewa an samu ƙarin yawan ɗalibai da kashi 12.3% daga adadin ɗalibai 12,860 da su ka tafi karatu daga Najeriya zuwa Amurka.
Amurka ‘yan Najeriya su ka fi tafiya karatu, daga nan sai Birtaniya.
Rahoton ya ce a zangon 2019/2020 an samu mutum 914,095 waɗanda su ka je Amurka karatu daga ƙasashen duniya baki ɗaya.
Yayin da a zangon 2022 aka samu mutum 948,000 daga ƙasashen duniya baki ɗaya.
Rahoton ya kuma daddale cewa ‘yan Najeriya ne mafiya yawan zuwa Amurka karatu, inda ofishin jakadancin Amurka a Abuja ya nuna cewa kashi 33% na masu zuwa Amurka karatu daga Afrika, duk daga Najeriya su ke.
Haka nan rahoton ya ce tsawon shekaru goma a duk shekara a jere adadin ƙaruwa ya ke yi, ba raguwa ba.
Baya ga Amurka da Ingila, wasu ƙasashen da ‘yan Najeriya ke tafiya karatu, sun haɗa da Malysia, Canada da Indiya.
