Wata ɗaya bayan Shugaba Muhammadu Buhari ya hana Ministar Harkokin Kuɗaɗe Zainab Ahmed da Ministan Shari’a Abubakar Malami fara biyan wasu kamfanoni daga kuɗaɗen asusun jigmhohi 36, Antoni Janar Malami ya kuma bayyana cewa Najeriya za ta biya wani kamfanin ƙasar Indiya dala miliyan 496, saboda abin da ya kira karya yarjejeniyar kamfanin sarrafa ƙarfafa na Ajaokuta da ke Jihar Kogi da Najeriya ɗin ta yi.
Cikin wata sanarwa da Kakakin Yaɗa Labaran Malami mai suna Umar Gwandu ya fitar, ya ce Gwamantin Tarayya ta amince za ta biya dala miliyan 496 ga Global Steel Holdings Ltd., mallakar wasu Indiyawa, waɗanda a shekarun baya aka sayar masu da wani kaso na hannun jarin kamfanin Ajaokuta Steel Company, amma daga baya cinikin ya ruguje.
A cewar Malami, kamfanin ya yi ma yi wa Najeriya sassauci, domin da farko dala biliyan 5.258 ya nemi a biya shi diyya, amma aka daddale a dala miliyan 496, kuma aka sasanta a haka ɗin.
A shekarun baya dai an yi yarjejeniyar tsakanin Najeriya da kamfanin Indiyawan, amma ganin ba su kai ga bayar da ko sisi daga cikin abin da yarjejeniya ta ce su fara biya ba, sai gwamnatin marigayi Umaru ‘Yar’Adua ta soke kwangilar, ta ce babu abin da Najeriya za ta amfana.
Malami ya ce Ma’aikatar Shari’a ta shawarci gwamnatin Umaru ‘Yar’Adua cewa kada a yi saurin soke yarjejeniyar, a ƙara wa kamfanin kwanaki 55 kamar yadda doka ta tanadar, idan ba su fara biyan kuɗin ba, to kamfanin ne zai biya Najeriya diyya kenan ta dala miliyan 26.
“Da gwamnatin tarayya ta yi haƙuri an kai ranar 25 Ga Mayu, 2008 har Global Holdings Ltd bai fara biyan kuɗi ba, to shi zai biya Najeriya diyya.” Cewar sanarwar da Umar Gwandu ya fitar a madadin Minista Malami.
Rikicin dai ya samo asali ne tun daga 1999 zuwa 2007, lokacin da Gwamnatin Obasanjo ta ƙulla yarjejeniyar damƙa ikon wani sashe na masana’antar ƙarafa ta Ajaokuta ga kamfanin Global Holdings Ltd.
Ƙasar Tarayyar Sobiyet ce (Rasha a yanzu) ta gina wa Najeriya masana’ar sarrafa ƙarafa ta Ajaokuta Steel da ke Jihar Kogi, cikin 1979 zuwa wasu shekaru. Amma har yau ma’aikatar ba ta amfana wa ƙasar nan komai ba, an kasa kammala aikin ya tsaya cak, kuma kadarorin da ke wurin an almubazzarantar da su.
Discussion about this post