Hukumar Sojojin Najeriya ta bayyana dalilan da su ka sa sama da sojojin Najeriya yin ritaya a kwanan nan.
Kakakin Yaɗa Labaran Sojojin Najeriya, Burgediya General Nwachukwu, ya bayyana cewa ritayar sojojin ba wani baƙon abu ba ne, haka kuma ba sabon abu ba ne, ba kuma wani abu ne bambarakwai ba.
Ya maida wannan raddi ne bayan wata jarida ta bayyana cewa sojoji 243 sun aika wa Babban Hafsan Askarawan Najeriya, Faruq Yahaya wasiƙun sanar da shi cewa sun yi ritaya daga aikin soja.
Rahoton dai ya nuna cewa yawancin sojojin duk kurata ne da sauran masu ƙananan igiyoyi da ke bakin daga da ke sansanonin fama da yaƙin ta’adda da kuma ‘yan bingida.
Nwachuku ya ce ƙarya ne da jaridar ta buga cewa sojojin sun nuna gajiya da kuma haushin rashin kulawa.
Daga nan ya caccaki jaridar tare da yin ƙorafin irin labaran da ya kamata su riƙa tantancewa kafin su buga.
Ya ce wannan labarin da jaridar ta buga akwai maƙarƙashiysr daƙile ƙoƙarin da Babban Hafsan Askarawan Najeriya, Faruq Yahaya ke yi wajen ganin an inganta rayuwar sosai.
Ya ce an samar wa sojoji lamunin motoci da na gidaje da sauran hanyoyin inganta rayuwar su.
Ya ce kamar tsarin aikin gwamnati kowane, shi ma aikin soja ya tanadar da damar yin ritaya ga wanda ke son yi bisa dalili wanda ya dace, domin dama aiki ne wanda mutum ya sa kan sa ya shiga don kishin ƙasar sa, saboda babu wanda aka tirsasa aka shigar da shi aikin soja.
