Gwamnan Jihar Ondo, kuma ɗan APC, Rotimi Akeredolu ya ragargaji gwamnatin Shugaba Muhammadu Buhari saboda bayar da kwangilar tsaro da kula da bututun mai har ta naira biliyan 48 da aka ba tsohon ɗan tawayen Neja-Delta, wato Tompolo.
Cikin wata sanarwa da Akeredolu wanda babban lauya ne ya sa wa hannu da kan sa, ya ce bayar da kwangilar ga kamfanonin da ke da alaƙa da Tompolo abin damuwa ne matuƙar gaske.
“Amma a hakan kuma za a riƙa nukura da jihohin da ke ƙoƙarin kafa jami’an tsaron su na jiha saboda su taimaka su samar da tsaro.”
Akeredolu na magana ne kan yadda Gwamnatin Tarayya ke nuna rashin amincewar jihohi su naɗa jami’an tsaro, kamar yadda Jihar Ondo ta kafa Ametakun.
PREMIUM TIMES ta buga labarin cewa Shugaban NNPC Mele Kyari ya kare hujjar bayar da gwangilar kula da bututun mai ga kamfanonin tsaro masu zaman kan su, kwangilar da ake ganin kamar dai Tompolo ne aka ba a fakaice.
Kwangilar ta naira biliyan 48 ce a shekara ɗaya, amma duk wata za a riƙa biyan kamfanonin tsaron naira biliyan 4 kenan.
Kyari ya ce Najeriya na ɗirka asarar biliyoyin nairori a kowace shekara, shi ya sa ta bayar da kwangilar, don a kawo ƙarshen ɓarnar fasa bututu da ɓatagari ke yi.
Sai dai kuma Gwamna Akeredolu ya ce, “bayar da kwangilar ya nuna shakku kan mashawartan gwamnati kan ƙoƙarin daƙile tsaro a ƙasar nan.” Inji Akeredolu.
PREMIUM TIMES Hausa ta buga labarin cewa, Shugaban NNPC ya ce da haɗin-bakin mutanen yanki, shugabannin addinai da jami’an tsaro ake satar ɗanyen mai.
Shugaban Kamfanin mai na NNPCL Mele Kyari ya yi ƙorafin yadda ake ɗirka gagarimar satar ɗanyen mai a Najeriya.
Da ya ke jawabi lokacin taron tattaunawa da manema labarai a Gidan Gwamnatin Tarayya a ranar Talata, Kyari ya ce kashi 95 bisa 100 na ɗanyen man da ake haƙowa a tashar Bonney duk ɓarayin da ke fasa bututu ne ke sace shi.
Daga nan kuma ya koka kan yawaitar wuraren da ake tace ɗanyen man da ɓarayin ke sata a cikin daji.
Kyari ya ce akwai hannun shugabannin coci-coci da na wasu malaman da ke kula da masallatai har ma da jami’an tsaro wajen satar mai ta hanyar fasa bututun mai da satar ɗanyen mai.
Ya ce a ƙoƙarin hana satar ɗanyen mai, NNPC ta haɗa kai da jami’an tsaro ta lalata tankuna 959 waɗanda ɓarayin mai ke tara man da su ka sata.
An kuma lalata takunan ƙasa 737, ramun ɓoye mai a ƙasa guda 452, tukanen tafa abinci 355, kwale-kwalen katako wanda ake jidar ɗanyen mai da su guda 179.
Ya ce an samu wannan gagarimar nasara daga watan Afrilu zuwa Agusta na wannan shekara.
Kyari ya ce jami’an tsaro sun ƙwato kayayyaki daban-daban da ake amfani da su wajen fasa bututu da kuma satar ɗanyen mai.
Haka nan kuma ya ce an ƙwace jiragen ruwan satar ɗanyen mai guda 11, ƙananan kwale-kwale masu gudun tsiya guda 30, tamkar ɗaukar mai 30, kuma an damƙe mutum 122 da ake zargi da satar ɗanyen mai cikin waɗannan watanni biyar.
“Ana gagarimar satar ɗanyen mai daga bututu tun daga Atlas Cove har zuwa Ibadan da ma sauran daffo ɗin mu 37 a faɗin ƙasar nan.
“Dalili kenan a yanzu ba mu iya aika mai ta bututu. Wasu bututun ma an kai shekaru 15 ba su yi aiki ba.
“Satar mai kuma kowa na ciki, kama daga mutanen yankuna, shugabannin addini da jami’an tsaro. Saboda babu yadda za a yi ka kawo manyan tirelolin ɗaukar mai a cikin yankuna masu jama’a da yawa, a riƙa lodi ana jigila ba tare da kowa ya sani ba.
“NNPC ta ƙwato lita miliyan 35.8 ta ɗanyen mai daga hannun ɓarayin mai, an kuma ƙwato lita miliyan 22 ta dizel. An ƙwato fetur kuma har da kananzir.”
Discussion about this post