Shugaban Ƙungiyar Ƙwadago reshen Jihar Enugu, ya bayyana cewa babban hatsari ne sosai idan gwamnati ya ci gaba da barin ɗalibai zama gidajen su, saboda yajin aikin Malaman Jami’o’i.
Virginus Nwobodo ya bayyana haka a lokacin da Ƙungiyar Ƙwadago reshen Jihar Enugu ta fita tattalin zanga-zangar nuna wa gwamnatin tarayya fushin yadda ta kasa kawo ƙarshen yajin aikin da malaman jami’o’i ke yi.
Malaman dai sun shiga yajin aikin baya-bayan nan tun cikin watan Fabrairu.
NLC ta shiga zanga-zanga ne domin nunawa gwamanti ɓacin ran zaman da ɗaliban jami’o’i ke yi a gida, alhalin ‘ya’yan shugabanni na can su na karatu a ƙasashen waje.
Ƙungiyar dai ta ce zanga-zangar da ya fara a dukkan faɗin ƙasar nan, ta gargaɗi ne. “Domin idan gwamnati ba ta kawo ƙarshen matsalar ba, to NLC za ta tsayar da komai a ƙasar nan.
“Babban hatsari ne a bar yara zaune a gida ba su zuwa makaranta. Yanzu haka wasu ɗaliban sun shiga mummunar hanyar yin garkuwa da mutane.
“A yanzu haka malaman jami’o’i su na fama da yunwa. Wasu da dama a cikin su an kore su daga gidan haya. Wasu kuma kuɗin ruwa, wuta, gas da sauran ɗawainiyar iyali sun gagare su.” Haka ya shaida wa Gwamna Ugwuanyi.
Cikin makon jiya ne Shugaba Muhammadu Buhari ya umarci Minista Ngige ya tsame hannun sa daga tattaunawa da ASUU
ASHAFA MURNAI
Tura ta kai bango a tirka-tirkar yajin Kungiyar Malaman Jami’o’i ta Ƙasa da Gwamnatin Tarayya, inda har Shugaba Muhammadu Buhari ya umarci Ministan Ƙwadago Chris Ngige ya tsame hannun sa daga jagorantar zaman sulhu da ASUU.
Buhari ya bayar da wannan umarni ne a ranar Talata, lokacin da ya gana da shugabannin ma’aikatu, hukumomi da cibiyoyin da yajin aikin malaman jami’o’i ya shafa.
An yi taron a Fadar Shugaban Ƙasa, inda nan take Buhari ya ce Ministan Ilmi Adamu Adamu ya karɓi ragamar jagorancin tattaunawa da zaman sulhu da ASUU, maimakon Minista Ngige.
A wurin taron, Adamu ya yi ƙorafi da kuma bayyana dalilin da ya sa tsawon lokaci sosai ba a jin ya na cewa komai dangane da yajin aikin malaman jami’o’i, duk kuwa da cewa shi ne Ministan Ilmi, ba Ngige ba.
“Tun cikin 2016 Ministan Ƙwadago Chris Ngige ya ce aikin zaman sulhu da ASUU ba na Ministan Ilmi ba ne, na Ministan Ƙwadago ne.” Haka aka ce Adamu ya furta a wurin taron, inda ya ƙara da cewa bai manta ba bayan Ngige ya faɗa masa, har hujjoji ya gabatar daga cikin dokokin Ƙungiyar Kare Haƙƙin Ma’aikata ta Duniya (ILO).
Ita ma ASUU ko a wani taron manema labarai da ta yi kwanan nan, ta zargi Ngige da kasancewa mutumin da ke kawo tsauraran matakan sasantawa, waɗanda hakan ne ke sa ASUU ɗin yi masa kunnen-uwar-shegu ta ƙi sasantawa da shi. ASUU ta ce Ngige ya janyo har aka kai zuwa yanzu ana yajin aiki.
Wata majiyar da aka yi taron da ita, kuma ya nemi a sakaya sunan ta, ta shaida wa PREMIUM TIMES cewa Buhari ya umarci Adamu Adamu ya karɓi jagorancin zaman sulhu da ASUU, amma fa bai bai wa Ministan makonni biyu ba kamar yadda aka buga a jaridu a ranar Talata. Ya ce Adamu ne da kan sa ya sanar wa manema labarai cewa ya na ganin a cikin makonni biyu zai warware rikicin.
“Amma gaskiya Adamu bai ce zai magance rikicin cikin makonni biyu ba. Ya dai faɗa a wurin taron cewa, “Cikin 2016 a wurin taron Ministoci da Buhari a wannan lokacin Ngige ya furta cewa aikin zaman sulhu da masu yajin aiki ba aikin Ministan Ilmi ba ne, aikin Ma’aikatar Ƙwadago da Kula da Ma’aikata.
“A lokacin dukkan Ministocin da ke wurin babu wanda ya yi magana. Shi ma Shugaba Buhari bai ce komai ba. Don haka ganin ministoci ba su yi jayayya da Ngige ba, kuma shi ma Buhari ya yi shiru, sai Minista Adamu ya ga cewa duk ana goyon bayan Ngige kenan, har da Buhari kan sa. Dalili kenan ya kame bakin sa ya yi shiru, kuma a bar Ngige da gaganiyar sulhu da ASUU.” Cewar majiyar PREMIUM TIMES.
