Hukumar Kwastam dake kula da shiyar zone A ta bayyana cewa ta kama mota dauke da kananan janareta 42.
Shugaban hukumar Hussein Ejibunu ya sanar da haka a cikin wannan makon a garin Legas.
Ya ce a cikin motar jami’an Kwastam sun kama buhunan shinkafa da katan 599 na naman kaji.
Ejibunu ya ce idan ba a manta ba a shekarar 2015 gwamnati ta hana shigo da kananan jenareta wanda aka fi sanin da ‘I better pass my neighbour’.
Ya ce gwamnati ta hana shigo da janaretan ne saboda wai hayakin sa na cutar da kiwon lafiyar jama’a.
Ejibunu ya ce a dalilin wannan doka da gwamnati ta saka ya sa hukumar ke farautar duk wanda ya shigo da shi.
” Hukumar ta kama Lita 41,950 na man fetur, buhunan shinkafa 9,917, kilogram 116.3 na ganyen wiwi, babura 29, katan 54 na man shafawa da gwanjon takalma 3,260.
“Sauran kamen da hukumar ta yi sun hada da buhuna 812 na shinkafa Basimati, daurin 1,041 na kayan gwanjo, motoci biya da Taya 8,500.
” An kama wadannan kaya a bangarori daban-dahan a yankin Kudu maso Yamma da mutum 14 dake da hannu a shigo da su.
Ejibunu ya ce jimlan kudin kayan da hukumar ta kama ya kai naira miliyan 818.8.
Ya yi kira ga mutane da su daina shigowa da kayan da gwamnati ta hana shigowa da su domin inganta tattalin arzikin kasar nan.
Discussion about this post