Gwamnan Jihar Kwara AbdulRahman AbdulRazak ya nuna goyon bayan sa ga miƙa takarar shugaban ƙasa a APC ga yankin Kudu.
AbdulRazak wanda ba a ga sa hannun sa a cikin sunayen Gwamnonin Arewa da su ka sa hanun amincewa a miƙa mulki ko takarar shugabanci a Kudu su 10, ya ce shi ne cikon na 11, amma babu sunan sa a lokacin.
Da ya ke bayyana dalilin rashin ganin sunan sa a cikin wata takardar da Kakakin Yaɗa Labaran sa Bashir Adigun ya sa wa hannu, AbdulRazak ya ce bai samu halartar taro zaman amincewar ba, saboda a lokacin ya na wata ganawa ce da dangin sa mai matuƙar muhimmanci.
“Gwamna bai samu halartar zaman amincewar ba, saboda ya halarci taron ɗaurin auren wata ‘yar uwar sa, a ranar 4 Ga Yuni, 2022.” Inji sanarwar.
Sai dai kuma yayin da Gwamnonin Arewa su ka amince a miƙa takara Kudu, har yanzu su na jiran su ji matsayar Shugaba Muhammadu Buhari a kan lamarin.
A wata tattaunawa da BBC Hausa ta yi da Gwamna Abubakar Badaru na Jigawa, ya ce har yanzu Buhari bai yanke shawarar miƙa takara ga ɗan kudu kai-tsaye ba.
Gwamna Abubakar Badaru na Jigawa ya ce har yanzu gwamnonin APC na Arewa na jiran Shugaba Muhammadu Buhari ya bayyana matsayar sa kan miƙa takarar shugaban ƙasa ga ɗan kudu kai-tsaye.
Badaru ya bayyana haka a cikin wata tattaunawar da ya yi da BBC Hausa a ranar Lahadi.
A ranar Asabar ce dai Gwamnonin APC na Arewa da masu faɗa-a-ji na jam’iyyar daga Arewa, su ka amince mulki ya koma kudu a zaɓen 2023. Wato dai APC za ta tsayar da ɗan takara kenan daga kudu.
Badaru wanda shi ma ya na cikin ‘yan takarar shugaban ƙasa, ya ce har yanzu Buhari bai bayyana matsayar sa a kan amincewa ko rashin amincewa da hakan ba.
Badaru ya ce maganar gwamnoni Arewa sun amince, bai tayi ne su ka miƙa, ba a kai ga daddalewa ba tukunna.
Badaru ya ce ya yi mamakin da ya ji “wai an raba takardar bayan taro mai ɗauke da sa hannun mutane, wadda a maganar gaskiya ba haka abin ya ke ba.
“Mu tayi ne mu ka miƙa wa Baba Buhari, idan ya ga hakan ne mafita kuma ya amince, shikenan, sai a yi hakan. Idan kuma bai amince ba, sai mu ci gaba a kan tsarin da mu ke. Amma dai mu gwamnonin Arewa mu ka goyon bayan duk wata matsaya da Buhari ya bijiro da ita.”
Ya ce Gwamnonin Arewa sun wakilta Gwamna Atiku Bagudu na Kebbi da Simon Lalong na Filato da Abdullahi Sule na Nasarawa su je su sanar wa Shugaba Buhari cewa sun yarda duk ɗan Arewa mai takara a APC, to ya janye a bar wa ‘yan kudu su fito da ɗan takara a cikin su.
“Gaskiya ne Gwamnonin Arewa kamar su 11, ciki har da Ni mun tattauna wannan batu, sannan mu ka aika wa Shugaba Buhari cewa mun yi la’akari da halin da ake ciki, saboda haka mun yarda a bai wa ‘yan kudi takarar shugaban ƙasa a ƙarƙashin APC.”
“Maganar janyewa ta kuwa, ba za ni yi gaggawar janyewa ba, har sai na ji matsayar da Shugaba Buhari ya fitar.”
Wato dai kenan har yanzu dukkan ‘yan takarar 23 kowa na ciki, ko ɗaya bai janye ba.
