Shugaban Sashen Koyon Kimiyyar Siyasa na Jami’ar Najeriya da ke Nsukka, Jonah Onouha, ya bayyana cewa Rasha za ta iya ci gaba da antaya ruwan wutar hare-hare a Ukraniya, komai tsananin takunkumin da Amurka da sauran ‘yan kazagin ta za su ƙaƙaba wa gwamnatin Vladimir Putin.
Sai kuma ya ce amma mafi alheri shi ne shiga tsakani domin a tautauna samun daidaiton dakatar da yaƙi, don a samu zaman lafiya.
Ya ce a samu ƙasashen da ba su goyon bayan kowane ɓangare domin su shawo kan Ukraniya ta dakatar da aniyar ta ta shiga cikin Ƙungiyar Ƙawancen Ƙasashen NATO.
“Dama da babban dalilin rikicin shi ne shigar da Ukraniya ta yi niyyar yi cikin ƙungiyar NATO. Hakan ne Rasha ke ganin cewa barazana ce a gare ta, domin maƙauta su ke da Rasha ɗin.
“Rasha na ganin idan Ukraniya ta shiga NATO, to ta bayar da ƙofa kenan ƙasashen Turai ta Yamma su kai wa Rasha hari.
“Matsawar aka tabbatar wa Rasha cewa Ukraniya ba za ta shiga ƙawancen NATO ba, to nan da nan Rasha za ta janye makaman ta, ta fice daga Ukraniya.” Inji malamin jami’ar.
Ya ce amma wata barazanar ƙaƙaba wa Rasha takunkumi ba zai yi wani tasiri ba, domin Rasha na da ƙarfin arziki, kuma ta na daga cikin manyan ƙasashen duniya mafi ƙarfin soja da na makamai a duniya.”
Ya ce amma a yanzu Rasha ba ta ganin cewa takunkumi zai iya sa ta fice ko ta daina kai hari a Ukraniya.
