Shugaban Rasha Vladimir Putin ya gargaɗi gungun ƙasashen Ƙungiyar Ƙawance Sojan Taron Dangi ta NATO cewa duk ƙasar da ta yi gangancin kafa dokar hana jiragen yaƙin Rasha kai hari Ukraniya, to ta sani ta shiga yaƙin kenan ita ma, saboda haka ‘maza bisa kan ta kawai’.
Putin ya ce ko kaɗan Rasha ba za ta saurara wa kowace ƙasar NATO ba, ko ita NATO ɗin kan ta, muddin su ka ce kada jiragen Rasha su keta hazon Ukraniya.
“Duk ƙasar da ta kafa mana dokar hana jiragen mu kai hari Ukraniya, to ita ma ta shigo yaƙin kenan. Kuma tsakanin mu da ita sai bata-kashi.” Inji Putin, kamar yadda Aljazeera ta ruwaito.
A ɓangare ɗaya kuma, Shugaban Ukraniya ya caccaki ƙasashen Turai da Amurka da ke cikin NATO, saboda sun ƙi goya masa baya a yaƙin da ya ke yi da Rasha.
‘Ƙasashen NATO Sun Mi Min Ingiza-mai-kantu-ruwa, Sun Bar Mu Rasha Na Kwankwatsar Mu’ -Shugaban Ukraniya:
Shugaban Ukraniya Volodymyr Zelenskyy ya ragargaji Ƙungiyar Ƙasashen Ƙawance Dakarun Yaƙi ta NATO saboda sun ƙi yarda su haramta wa jiragen yaƙin Rasha giftawa cikin ƙasar sa.
Volodymyr Zelenskyy ya ce ƙin shata wannan gargaɗin ya sa Rashawa na samun galaba sosai a kan ƙasar ta. Haka dai Gidan Talabijin na Aljazeera ya ruwaito.
“Ai shikenan mun bani. A yau sojojin Rasha sun samu damar ragargazar birane, garuruwa da ƙauyukan Ukraniya, saboda NATO ta ƙi kafa dokar haramta jiragen Rasha giftawa cikin Ukraniya.” Haka Volodymyr Zelenskyy ya bayyana a cikin talbijin a ranar Juma’a.
“A yau NATO ta nuna ba ta da ƙarfi. Ta nuna gazawa, ta ruɗe kuma gigitatta ce. Ƙungiya ce wadda ba ta maida yaƙin ƙasashen Turai da ‘yancin Turai muradin ta mafi muhimmanci ba.”
“Dukkan waɗanda aka kashe dalilin wannan yaƙi, an kashe su ne saboda gazawar NATO da rashin haɗin kan ƙasashen da ke cikin ƙungiyar.”
Rasha ta amince ta tsagaita wutar yini ɗaya, domin kwashe mutanen da ke biranen Mariupol da Volnovakha da ta hana shiga da fita.
Rasha ta amince da tsagaita wutar yini guda domin a gaggauta kwashe ɗimbin mutanen da ke cikin garuruwan Mariupol da Volnovakha, garuruwa biyu da ta yi wa ƙofar-raggo.
Ma’aikatar Tsaron Rasha ta ce ta amince da tsagaita wuta domin a samu damar tura kayan agajin gaggawa da ɗimbin jama’ar da yaƙin ya ritsa da su a biranen biyu.
“A yau 5 Ga Maris, mun tsagaita wuta daga ƙarfe 10 agogon Moscow domin a samu shigar da kayan agaji da kuma kwashe mutanen da ke ciki Mariupol da Volnovakha.”
Amma dai har yanzu ba a ji komai daga ɓangaren Ukraniya ba. Sannan kuma ba a san ko har zuwa wane lokaci ne tsagaita wutar zai ɗauka ba. Duk da dai wani jami’i ya shaida cewa tsagaita wutar zai ƙare ne daga 4 na yamma.
Shi ma Magajin Garin Volnovakha mai suna Vadym Boychenko, ya ce, “ba mu da wani zaɓi sai ficewa daga garin.”
“Ai mutane su ne gari, ba gine-gine ko gidaje ba. Shi ya sa za a kwashe jama’a domin tsira da rayukan su.”
Discussion about this post