Hukumar Kwastam dake kula da shiyar jihar Ogun ta kama motar ‘yan sanda dauke da shinkafar gwamnati makil.
Shugaban hukumar Bamidele Makinde ya sanar da haka ranar Talata da yake ganawa da manema labarai a garin Abeokuta.
Makinde ya ce motar da hukumar ta kama kirar ‘Hilux van’ na dauke da lambar PF 10889 SPY sannan an loda ta da manyan buhunan shinkafa 2,750.
Ya ce direban dake tuka motan dai ya gudu.
Makinde ya ce duk da an ga mtar da lambar motar ‘yan sanda da ‘Siren’ ba a tabbatar ba ko na ‘yan sandan bane har yanzu tukunna.
Kakakin rundunar ‘yan sandan jihar Abimbola Oyeyemi ya ce ba shi da masaniya akan kamen da hukumar Kwastam ta yi amma ya ce zai gana da manema labarai da zarar ya samu bayanai akai.
Bayam haka Makinde ya kara da cewa hukumar ta kama buhunan shinkafar gwamnati 5,429 daga 9 ga Fabrairu zuwa 21 ga Maris.
Ya ce a tsakanin wannan lokaci hukumar ta kama buhuna 133 da kulli 181 na tabar wiwi, motoci 18, jarkokin man gyada 13, buhuna biyu da dilolin gwanjo.
Hukumar ta Kuma kama buhuna 25 da dilolin takalma na gwanjo, kwalaye 880 na naman kaji da lita 26,725 na man fetur.
Makinde ya ce a lissafe dai jimlar kudaden kayan da hukumar ta kama ya kai naira miliyan 143,905,508.
