Gwamnatin Najeriya ta kaddamar asusun Naira biliyan 62.1 domin samar da kuɗaɗen da za a bukata wajen yaki da cutar ƙanjamau a kasar nan.
A taron kaddamar da asusun da aka yi a dakin taro dake fadar shugaban ƙasa a Abuja shugaban hukumar dakile yaduwar cutar Kanjamau ta ƙasa NACA Gambo Aliyu ya ce asusun zai taimaka wajen kara yawan bada magani ga mutanen dake fama da cutar da basu shan magani da kare jarirai daga kamuwa da cutar yayin da suke cikin uwayen su.
Idan ba a manta ba a tun shekarar 2018 ne gwamnati ta tsayar cewa za ta kafa asusu domin dakile yaduwar cutar a kasar nan.
Gwamnati ta ce makasudin kafa wannan asusu shine domin a hada karfi da karfe da kungiyoyi masu zaman kansu domin yaki da cutar.
Yaduwar cutar Kanjamau a jarirai
Sakamakon wani bincike da UNICEF ta gabatar a shekarar 2021 ya nuna cewa akwai jariri daya da ke kamuwa da kanjamau a duk minti daya a duniya a shekarar 2020.
” A Najeriya akalla yaro daya mai shekaru daga 0-9 ke kamuwa da kanjamau a cikin minti 30 duk rana a shekarar.” Sakamakon wani bincike da aka yi a 2020.
A kididdigar da aka yi akwai yara 20,695 da suka kamu da cutar a Najeriya a cikin shekarar 2020.
Matakan da gwamnati ta dauka
A taron shugaban ƙasa Muhammadu Buhari ya ce samun kariya daga kamuwa da cutar hakki ne na kowani dan Najeriya.
Shugaban Buhari ya ce a dalilin haka gwamnatin sa za ta zage damtse wajen ganin ta rage yaduwar cutar a kasar nan.
Sakataren gwamnatin tarayya Boss Mustapha ya ce kafa wannan asusun da gwamnati zai taimaka wajen ganin burin gwamnatin ya cika na rage yaɗuwar cutar a ƙasar nan.
Mustapha ya ce an kashe dala biliyan 6.2 wajen yaki da cutar a kasar nan daga shekarar 2005 zuwa yanzu.
Shugaban kula da asusun Jekwu Ozoemene ya ce za a kashe kudaden asusun ne wajen ganin Najeriya ta cimma burinta na ganin Kashi 95% sun san matsayinsu game da cutar, kashi 95% dake dauke da cutar na Shan magani sannan an rage yawan mutanen da cutar ke kashewa a kasar nan.
Ozoemene ya ce hakan zai yiwu ta hanyar inganta kiwon lafiyar mata musamman a yankunan karkara, wayar da mutane sanin illar rashin kare jarirai daga kamuwa da cutar, inganta yin gwajin cutar a tsakanin mata masu ciki da Kara yawan mutanen da ya kamata suna shan maganin cutar.
