Wasu da ake zargin mahara ne sun yi awun gaba da wata mata ‘yar kasuwa a garin Tegina dake Karamar Hukumar Rafi ta Jihar Neja kuma sun yi barazanar sake dawuwa garin nan bada dadewa.
Matar Mai suna Rabi Usman, an sace ta ne ranar Asabar da misalin karfe 11 na dare, cewar mutanen garin da suka shaidawa Premium Times Hausa.
Rabi babbar ‘yar kasuwa ce sannan tana da mallakin gidan buredi a garin.
Yan Bindigar sun matsawa garin na Tegina tun bayan da suka sace Dalibai 136 a Islamiyya Salihu Tanko a watan Mayun bara. Sun sako daliban ne bayan Iyaye da Yan uwa sun biya kudin fansa na Naira 60 da sabbin Babura guda biyar.
Bayan sace daliban, sun kuma dawowa a inda suka sace wasu mutum hudu harma sun kashe daya daga cikinsu bayan sun karbi kudin fansa har miliyan takwas.
A wannan harin na sanar Asabar, shaidu sun ce Yan Bindigar sun shigo garin na Tegina ne da muggan makamai kuma sun bar sakon cewa zasu dawo su dauki duk wane mai arziki a garin na Tegina.
Wane mazaunin garin kuma jami’in Hukumar NURTW, Muhammed Bello, ya shaidawa Premium Times Hausa cewa sakon na Yan Bindiga cewa zasu dawo, ya jawo zaman dar dar a garin.
Muhammad yayi Kira ga gwamnati dasu kawowa garin Tegina dauki ta hanyar kafa rundunar tsaro na hadin gwiwa tare da basu kayan aiki irin na zamani.
” Yan bindigan sun kai su 25 da suka dira kauyen da bayan sun kama Rabi wasu daga cikinsu sun rika kwace wayoyin mutane har wani ma daga cikin ‘yan bindigan ya yi kokarin sace wani bijimin sa a lokacin da za su wuce.
Premium Times Hausa ta tuntubi sakataren Gwannatin Jihar Neja, Ahmad Matane, Amma yace haryanzu bashi da labarin harin.
Shima Kakakin Yan Sandar Jihar ta Neja Wasiu Abiodun, bai dauki wayar da wakilinmu yayi masa ba.
Yan Suna suna cigaba da cin Karen su ba babbaka duk da Umarnin da shugaba Muhammadu Buhari ya bayar cewa ayi amfani da karfin soja na gaske wajen kai musu Hari.
