Yayin da aka shiga sabuwar shekarar 2022 ana murna da barkar fita 2021, shekarar da aka ji jiki sosai a duniya saboda korona, su kuwa attajiran Afrika mashahurai su 18, ba su ji jiki a 2021 ba, haka kuma sun fara shiga shekarar 2022 da nasibin kasuwa.
Ya kamata a fara sanin sunayen na su tukunna, kafin a ji yadda suka kwantar da cutar korona, cutar da har yanzu sauran ƙasashen duniya na fama da ita.
1. Aliko Ɗangote: Dala Biliyan 13.9:
Shekarun sa 64. Ya fi ƙarfi a harkar siminti da sugar. Ya kusa kammala matatar fetur da babu kamar ta mai zaman kan ta. Arzikin sa daidai ya ke da ƙarfin arzikin ƙasar Senegal baki ɗaya.
2. Johann Rupert: Dala Biliyan 11:
Shekarun Rupert 71, kuma ya na hada-hadar kayan alatu masu tsada ne da sauran kayan ƙwalisa.
3. Nicky Oppenheimer: Dala Biliyan 8.7:
Shekarun Oppenheimer 76 a duniya, ya fi ƙarfi a hada-hadar daimon.
4. Nessef Sawiris: Dala Biliyan 8.6:
Shekarun Sawiris 61 ya fi ƙarfi wajen harkokin gine-gine da kuma zuba jari a masana’antu.
5. Abdulsamad Rabi’u: Dala Biliyan 7:
Shekarun sa 61. Kamar yadda ya ke daga Kano gari ɗaya da Ɗagote, haka ma sana’ar su iri ɗaya, wato sarrafa siminti da sugar.
6. Mike Adenuga: Dala Biliyan 6.7: Shekarun sa 68 a duniya, kuma ya fi ƙarfi wajen hada-hadar sadarwa. Shi ke da kamfanin Go.
7. Issael Rabrab: Dala Biliyan 5.1: Shekarun sa 78 a duniya, sannan ya na hada-hadar kayan abinci ne.
8. Naguib Sawris: Dala Biliyan 5.1: Shekarun sa 61. Shi ma kamar Adenuga, shi ma harkokin sadarwa ya ke yi.
9. Patrice Motsepe: Dala Biliyan 3.1:
Shekarun Motsepe 59, kuma shi ne mafi ƙarancin shekaru a cikin attajiran 18 na Afrika. Ya na sana’ar ma’adinai ne.
10. Koos Bekker: Dala Biliyan 2.7:
Shekarun Bekker 69. Ya fi ƙarfi wajen kafa kafafen yaɗa labarai da hada-hadar zuba jari a kamfanoni.
10. Strive Masiyiwa: Dala Biliyan 2.7:
Shekarun Masiyiwa 60. Shi ma harkar sadarwa ce ya fi maida ƙarfi a kan ta.
12. Mohammed Mansour: Dala Biliyan 2.5:
Mansour dattijo ne, shekarun sa 74 a duniya. Ya na sana’ar komai-da-ruwan-ka, inda ya ke faɗaɗa jarin sa a duk inda ya ga riba za ta fita.
13. Aziz Akhannouch: Dala Biliyan 2.6:
Shekarun sa 61 a duniya, kuma ya na harkar banki ne. Amma fa shi ma ya na yin kasuwancin komai-da-ruwan-ka.
14. Michiel Le Roux: Dala Biliyan 1.7:
Shekarun Le Roux 73. Dattijo ne da ya fi ƙwarewa a hada-hadar banki.
15. Othman Benjelloum: Dala Biliyan 1.5:
Shekarun sa 89 a duniya. Ya tsufa sosai. Ya na harkar banki da kuma hada-hadar zuba jari.
15. Mohammed Denji: Dala Biliyan 1.5:
Shekarun Denji 46. Kusan shi ne za a kira matashi kenan a rukunin waɗannan attajirai.
15. Youssef Mansour: Dala Biliyan 1.5:
Shekarun Youssef Mansour 76. Kuma sana’ar komai-da-ruwan-ka ya ke yi.
18. Yessen Mansour: Dala Biliyan 1.1:
Cikon na 10 wato Yessen ya na da shekaru 60 a duniya. Shi ma komai-da-ruwan-ka ya ke yi.
