Rundunar ‘yan sandan jihar Jigawa ta bayyana cewa ‘yan bindiga sun kashe jami’an ta biyu kuma sun yi garkuwa da sirikin wani babban dan kwangila a jihar.
Wannan abu dai ya auku ne a kauyen Kwalam dake karamar hukumar Taura.
‘Yan bindigan sun yi garkuwa da sirikin Haruna Maifata, Ma’aru Abubakar bayan sun kashe ‘yan sandan biyu dake sintiri a kauyen.
Kakakin rundunar Lawan Adam da ya tabbatar da haka wa manema labarai ranar Litini ya ce ‘yan bindigan sun kashe sufirtanda Anas Usaini da sifeto Sunusi Alhassan.
Ya ce ‘yan bindigan sun kuma cinna wa motan ‘yan sandan wuta.
Adam ya kara da cewa tuni rundunar ta fara farautar ‘yan bindigan domin ceto Abubakar.
Bayan haka mazauna kauyen sun ce ‘yan bindigan sun yi garkuwa da Abubakar a cikin gidansa bayan sun kashe ‘yan sanda biyu a kauyen.
Mazaunan sun ce wannan abin tashin hankalin ya auku ne bayan an yi watanni uku da wani babban dan kasuwa Kabiru Taura ya dawo daga hannun masu garkuwa da mutane da ke tsare da shi bayan ya biya sama da naira miliyan 20.
Mazauna kauyen sun yi kira ga gwamnati da ta yi gaggawan samar da tsaro kafin lokacin daukan mataki ya kure.
