Yanzu haka dai Gwamnatin Tarayya a ƙarƙashin Ma’aikatar Ayyukan Jinƙai, Agaji da Inganta Rayuwa ta fata bayar da horo na watanni uku matasan ƙasar nan su 20,000, waɗanda za ta koya wa dabarun fasahar zamani.
Babban Sakataren ma’aikatar Nura Alƙali ya ce, “‘N-Knowledge’ wani ɓangare ne na shirin ‘N-Power’ wanda zai maida hankali ga bai wa matasan Nijeriya horaswar da ta kamata tare da satifiket domin su zama ƙwararrun ma’aikata, masu ƙirƙira kuma ‘yan kasuwa da za su iya yin aiki a cikin gida da ƙasar waje.
“Shirin na ‘N-Power (N-Knowledge)’ zai horas da matasa 20,000 daidai da muradin duniya a matsayin waɗanda za su iya yin aiki a ƙasashen waje a ɓangaren fasahar harkokin komfuta da intanet.”
Ya ce an tsara ɓangaren horaswa na shirin ne don bunƙasa ƙwarewar matasan wajen ƙirƙirar manhaja da horaswa kan haɗawa da gyara kayan aikin komfuta wanda zai sanya Nijeriya ta shiga sahun ƙasashen da ke tura ma’aikata zuwa wasu ƙasashen domin su yi aikin haɗa manhaja.
A cewar sa, “Shirin zai samar da ƙwarewa da iyawa a fagen tsara manhajojin wayar hannu da gina gidajen yana tare da inganta basira don a haɓaka masana’antar fasahar yaɗa labarai da ilimin intanet a Nijeriya.
“Shirin ya ƙunshi aje matasa a wani keɓaɓɓen wuri ana horas da su har tsawon wata uku sannan a ba su aikin wucin gadi na wata shida a dukkan sassa shida na ƙasar nan.
“Jimillar mutum 20,000 za su ci moriyar shirin.”
Ya ƙara da cewa a ƙarshen shirin, matasan da aka gamsu da cancantar su daga horaswar da aka yi masu za a ba su satifiket da takardun shaida.
Ya ce, “A lokacin wannan tirenin ɗin za a yi masu karatu daban-daban wanda ba shakka zai ƙara masu sanin makamar aiki har su kasance sun shirya wa shiga duk wata gogayya a duniya wajen aiki.
“Wannan ya na da muhimmanci domin kuwa waɗanda aka horas ɗin za a koya masu darussan da za su amfane su a iya tsawon rayuwar su tare da sauya masu tunani, da ɗabi’u nagari na gudanar da aiki a yayin da kuma ake karantar da su ƙa’idojin yin mu’amala da juna.”
Za a yi wannan aikin bayar da horaswa a shiyyoyi shida na faɗin ƙasar nan, inda a Shiyyar Arewa maso Yamma tuni aka tattara matasan da za su ci moriyar shirin daga jihohin Zamfara, Kebbi, Sokoto, Katsina, Kano da kuma Jigawa a birnin Kano. Tun a ranar Lahadi da ta gabata suka hallara, kuma tuni aka warware masu matsalar rashin samun kuɗaɗen alawus ɗin su na abinci da kuɗin motar da ya kamata a ba su da zarar sun isa sansanin horarwa.
Dalilin Jinkirin Biya Da Kuma Yadda Aka Warware Matsalar:
Ma’aikatar Ayyukan Jinƙai, Agaji da Inganta Rayuwa ta bayyana cewa tun da farko an samu ɗan jinkirin biyan alawus ɗin ne, saboda daga cikin matasa 20,000 da aka ɗauka a sassa daban-daban, 7,401 daga cikin su ba su ƙarasa cika bayanan asusun bankin su ba. Kuma a cikin asusun ne ya kamata a tura wa kowa kuɗin sa.
Don haka a yanzu ma’aikatar tuni ta warware matsalar ta hanyar baiwa kowa na sa alawus ɗin a sansanin horarwar.
Ribar Da Ke Tattare Da Shirin N-Knowledge Ga Matasa:
Fa’ida ta farko dai ita ce kyauta za a bayar da horon ƙwarewa ga dukkan matasan, ba kuɗi za su biya ba. Gwamnati na la’akari ne kan ƙudirin ta na ganin ta inganta rayuwar al’umma, musamman matasa waɗanda nan gaba za su dogara da kan su da kuma ɗaukar nauyin wasu.
Don haka koyar da su kyauta zai ƙara zaburar da su, maimakon idan a kamfanonin koyan fasahar zamani za su je, sai sun biya maƙudan kuɗaɗe domin a koyar da su.
Riba ta biyu kuma ita ce kyauta za a bai wa kowa wurin kwanciya. Ko daga wace jiha ka zo, tuni an tanadar maka masauki ko muhallin kwanciya tsawon wata ukun da za ka yi a na ba ka horo kyauta.
Gwamnatin Shugaba Buhari ta maida matasan Nijeriya ‘yan gata. Domin har kuɗin mota za a biya waɗanda za a horas ɗin.
Yayin da kuɗin mota daga Katsina ko Jigawa zuwa Kano bai wuce naira 1,000 ba, gwamnati za ta biya kowane matashi ɗaya naira 15,000 kuɗin motar zuwa sansanin koyarwa a Kano.
Haka nan an tanadi wasu waɗansu naira 15,000 da za a bayar ga kowa idan sun kammala samun tirenin ɗin za su tafi gida. Wato naira 30,000 kenan kuɗin motar zuwa da na komawa gida.
Ciyar da matasan kyauta tsawon watanni uku yayin da ake koyar da su kyauta, wannan ma wata garaɓasa ce da wannan gwamnati ta bijiro da ita, domin taya matasan ƙasar nan yin hoɓɓasan tashi a yi aiki.
Ba abinci za a riƙa dafa masu ba. Tuni an ware wa kowa naira 27,000 a matsayin kuɗin abincin sa na wata ɗaya.
An tsara cewa naira 300 za a biya kowa kuɗin abincin safe, naira 300 da rana. Da dare ma abincin naira 300. A haka kuɗin sun kama kowa naira 900 kenan duk wata.
Yadda aka tsara, kuma haka aka yi bayan an warware matsalar jinkirin, an bai wa kowane matashi naira 42,000 cur bayan isa sansanin bayar da horo a Kano.
Kamar yadda aka yi wa na Shiyyar Kano, haka abin ya ke babu bambaci da na Shiyyar Arewa maso Gabas a Bauchi, Arewa ta Tsakiya Abuja, Kudu maso Gabas a Enugu, Kudu maso Kudu a Akwa Ibom da kuma Kudu maso Yamma a Legas.
Bayar da kayan tirenin kyauta ba ƙaramin agaji ba ne ga matasan, waɗanda aka ɗauka kyauta kuma ake horar da su kyauta.
Masu koyan gyaran kwamfuta za a ba su kayan gyara kyauta. Su kuma waɗanda za su koyi fasahar zane-zane, za a ba su kwamfutar hannu.
Amma kuma kayan ba za su zama na su ba har sai bayan sun kammala tirenin tukunna. Kafin nan, za su riƙa bayar da ajiyar kayan ga jami’an horar da su ayyukan fasahar.
Samun aiki bayan an kammala wannan tirenin babban rufin asiri ne ga matasa. Duk wanda ya kammala wannan horo ya yi bankwana da zaman dakali ko zaman kashe wando, ballantana yawan roƙon kuɗin ɓatarwa da na biyan buƙatu.
Matashin da ya samu wannan horaswa ba shi buƙatar kama hayar ofis ko shago. Zai iya yin aiki daga gida don daga ɗakin kwanan sa. Mai ƙwarewa a fasahar gyare-gyare kuwa, ko a ina zai iya zuwa ya yi gyara a biya shi.
Wannan fa shi ake kira fasahar ka jarin ka.
Damar zuwa ƙasashen waje yin ayyukan fasahar zamani, kamar yadda Babban Sakataren Ma’aikatar Ayyukan Jinƙai, Agaji da Inganta Rayuwa ya bayyana.
A nan gwamnati ta zaburar da matasa dubbai sun fahimci duniya da inda aka sa gaba. Sun tashi daga rayuwar kifin-rijiyar da su ke yi a lungunan unguwanni, garuruwa da ƙauyukan su.
A ƙarshen tirenin kowane matashi zai koma gida ɗauke da tsarabar ƙwarewa, katin shaidar samun horo, wanda zai iya amfani da shi a cikin ƙasar nan da ma duniya, kayan aiki da kuma kuɗin motar komawa gida
Discussion about this post