Sakamakon binciken da Shirin NASCP ya gudanar ya nuna cewa jarirai akalla 3,400 ne suka kamu da cutar kanjamau a tsakanin shekara hudu a Najeriya.
Sakamakon binciken ya nuna gwajin sumfurin jinin jarirai 73,422 da shirin ya yi daga shekarar 2017 zuwa 2020 aka samu jarirai 3,409 dauke da cutar.
Mataimakin shugaban shirin kare jarirai daga kamuwa da kanjamau tun suna cikin uwayensu PMTCT Gbenga Ijaodola ya sanar da haka a taron tattauna hanyoyin inganta kare jarirai a kasar nan da aka yi a Calabar jihar Cross Rivers ranar Litini.
“A shekarar 2020 an yi gwajin sumfurin jinin jarirai 19,715 inda sakamakon gwajin ya nuna cewa jarirai 409 sun kamu. A shekarar 2019 an dauki sumfurin jinin jarirai 19,947 an gano jarirai 833 sun kamu.
“A shekarar 2018 jarirai 808 suka kamu daga sumfurin jini 17,488 da aka yi wa gwaji. A shekarar 2017 jarirai 1,359 sun kamu daga sumfurin jini 16,272 da aka yi wa gwaji.
Dalilin da ya sa jarirai ke kamuwa da cutar kanjamau
Ijaodola ya ce rashin zuwa asibiti domin yin awon ciki da mata ke kin yi, haihuwa a gida ba tare da taimakon kwararriyar ungozoma ba, rashin kawo yara asibiti domin yi musu allurar rigakafin cututtukan dake kashe su na daga cikin matsalolin dake sa jarirai na kamuwa da cutar.
Ya tabbatar cewa gwamnati a shirye take ta dauki makatan da za su taimaka mata wajen ganin ta kare jarirai daga kamuwa da cutar.
Ijaodola ya ce gwamnati za ta hada hannu da masu ruwa da tsaki domin ganin an ci gaba da wayar da kan mata game da mahimmancin zuwa asibitin yin awon ciki da haihuwa a asibiti, ko kuma karkashin kulan kwararriyar Ungozoma.
Ya kuma yi kira ga manema labarai da su ci gaba da buga labarai domin wayar da kan mutane sanin mahimmancin kare yara daga kamuwa da cutar Kanjamau.
Matsalolin da ake fama da su
1. Rashin ware wa shirin kudade da gwamnatocin jihohin kasar nan ke kin yi.
2. Rashin samar wa mata masu fama da cutar kular da ya kamata.
3. Rashin magungunan cutar domin mata da yaran dake fama da cutar.
4. Rashin samar wa yara kulan da ya kamata da tabbatar da cewa iyaye na kawo ‘ya’yan su asibiti domin yi musu gwajin cutar.
