Rundunar tsaron yankin Yarabawa, Amotekun ta kama shanu 250 da ake zargin sun barnata gonaki a jihar Ondo

0

Rundunar Tsaron yankin jihohin Yarabawa, Amotekun ta kama shanu 250 da ta ke zargi da barnata gonaki a gonaki da dama a fanin jihar.

An kama wadannan shanu ne a garuruwan Ipogun, Ilara, Owena Dam da ke karamar hukumar Ifedore, jihar Ondo.

Kwamandan Amotekun na jihar Ondo, Adetunji Adeleye ya bayyana haka da yake zantawa da manema labarai a garin Akure, babban birnin jihar Ondo.

Adeleye ya shaida cewa ko da ya ziyarci gonakin da shanun suke lalata ya iske wasu a wurin suna barnata kayan gona ba su tafi ba.

” A wasu gonakin ma ba shanun ne ke hakar doya, rogo da gwazan da aka shuka ba suna ci, makiyayan da kan su ke hako musu abincin suna baiwa dabbobin suna ci.

” Haka kuma, a wani gonan mun iske makiyayan tsaye suna jiran mu. Mu yi kokarin afka mana amma daga bay sai suka arce. Mun kama shanu 250.

Channels TV wanda ita ce ta ruwaito wannan labari ta ce a karshe an rattaba hannu a wata yarjejeniya tsakanin su da manoma da rundunar domin gudun kada irin haka ya sake faruwa.

Tsauraran Dokoki 6 Da Gwamnatin Ondo Ta Kakaba Wa Makiyaya:

1. Makiyaya su gaggauta ficewa daga dukkan dazukan gwamnati da ke cikin jihar Ondo, nan da kwanaki bakwai, daga ranar Litinin 18 Ga Janairu, 2021 za su fara kirgawa.

2. An haramta kiwo cikin dare, saboda yawancin gonakin da makiyaya ke cinye wa amfanin gona, duk da dare ake yin aika-aikar.

3. An haramta zirga-zirgar shanun kiwo a kan manyan titina da kuma cikin gari.

4. An haramta kiwo ga duk wani yaron da ba balagi ba.

5. An umarci dukkan jami’an tsaron da ke Jihar Ondo su tirsasa bin wannan dokar tilas.

6. Amma gwamnatin mu mai tausayi ce, don haka duk wani mai son yin kiwo a jihar nan, to ya gaggauta yin rajista da hukumar da nauyin kula a kiwo ke kan ta.

Share.

game da Author