Kotu ta bada belin Sowore kan kudi naira milyan 20

0

Mai Shari’a Mabel Segun-Bello ta Kotun Majistare a Abuja, ta dankara wa mawallafin Sahara Reporters, Omoyele Sowore sharadin beli na naira milyan 20.

Baya ga wanda zai ajiye wa kotu wadannan kudade, ana bukatar mutum biyu wadanda za su tsaya masa.

Sannan kuma an kafa masa sharadin kada ya fita daga Abuja, Babban birnin tarayya.

Segun-Bello ta ce ta bada belin su, domin shi da sauran mutum hudun da ake tuhumar su tare, ba su tsallake hurumin bada beli ba.

Ta kuma kara da cewa ta bada belin su ne domin cika sharadin ‘yancin su da dokar kasa ta bai wa kowane dan Adam.

Sai dai kuma ya yi kiran cewa hukuma ta rika sa musu ido domin tabbatar da cewa ba su yi wani abin da ka iya tayar da hankalin jama’a ba.

An dai kama su a ranar 31 Ga Disamba, bisa zargin sun gudanar da taron da ba bisa ka’ida ya ke ba, tare da kokarin tayar da zaune tsaye.

Bayar da belin ya samu cikas, a ranar Juma’a, saboda kama daga Sowore da sauran wadanda ake tuhumar su tare da kuma lauyoyi babu wanda ya halarci kotun.

Babban lauya mai kare su Sowore, Marshal Abubakar, ya nemi beli a ranar Juma’a, amma bai yiwu ba saboda ‘yan sanda ba su gabatar da Sowore a ranar a kotu ba.

Marshal Abubakar ya ce jami’an tsaron cewa su ka wai sun kasa gabatar da Sowore da sauran mutum hudun da ake tuhumar su tare, saboda fayil din tuhumar su na hannun wani Mataimakin Sufeto Janar na ’Yan Sanda a ranar.

Ya ce shi kuma Mataimakin Sufeto Janar din, ya ce ya mika fayil din ga Daraktan Shigar da Kararraki na Kasa, a bisa umarnin Antoni Janar, Kuma Ministan Shari’a, Abubakar Malami.

Share.

game da Author