DA WANNE ZA A JI?: Zazzabin Lassa ta lashe rayukan mutum 63 a jihar Ondo

0

Akalla mutum 63 ne suka mutu a dalilin kamuwa da zazzabin lassa a jihar Ondo.

Zazzabin lassa ya fi cutar covid-19 tsanani domin cutar Korona ta yi ajalin mutum 30 ne kacal a jihar 0ndo ita ko zazzabin lassa ta lashe mutum 63 ne a jihar.

Mutum 1,482 ne suka kamu da Korona a jihar, sannan mutum 363 suka kamu da zazzabin lassa a jihar.

Daga cikin mutum 963 da suka kamu da zazzabin lassa a kasar nan jihohin Ondo da Edo na daga kashi 74 bisa 100.

Bayan haka Wani likita a jihar Ondo Steven Fagbemi ya ce abin mamaki ne yadda zazzabin lassa ke yaduwa a kasar a lokacin damina.

Fagbemi ya ce a da cutar ta fi yaduwa a lokacin rani da hunturu ne sai gashi a yanzu har a lokacin damuna yana yaduwa.

Matakan Kiyaye Kamuwa Da Zazzabin Lassa

1 – A raba beraye daga cikin gida: Kada a yi sakaci har beraye su samu wurin zama a cikin gida.

2 – A toshe duk wani rami a gida: Beraye daga wani gida kan shigo maka su boye, idan ka bar ramu a cikin gidan ka.

3 – A rika barin abinci ya dahu sosai: A rika cin abin da aka dafa ya dafu sosai.

4 – A guji taba mataccen bera ko mai rai da hannu: Taba mataccen bera ko mai rai da hannu na iya sa a kamu da cutar Zazabin Lassa.

5 – A rika yawaita tsaftace gida da kewayen sa: Barin datti a gina na kawo beraye ko daga waje ko daga wani gida.

6 – A guji cin kayan marmarin da bera ya gutsira: Wannan ganganci ne sosai, don haka a guji ci ko da kuwa an wanke.

7 – A rika ajiye abinci a wuri mai murfi: Bri abinci a bude kan kai bera ya ci, kuma har yayi fitsari ko kashi a kai.

8 – A rika rufe kwandon zuba shara: Beraye na buruntu cikin kwandon shara, su na cin sauran abincin da aka zubar.

9 – A rika wanke hannu da sabulu da ruwa mai tsafta: Dama wannan na cikin matakan farko na tabbatar da tsafta a jikin mutum.

10 – A rika garzayawa asibiti idan babu lafiya: Garzayawa asibiti ya fi a tsaya ana kame-kamen shan magani a gida.

11 – A daina shanya abinci a waje kuma a bude a kasa: Barin abinci a bude illa ce, sannan shanya abinci a kasa ko a kan dabe kan haifar da cututtuka.

12 – A guje kusantar wanda ya kamu da cutar: Likita ne kadai zai iya kusantar wanda ya kamu da zazzabin lassa. Don haka a kiyaye.

Share.

game da Author