Sarkin Ilori ya tabbatar da nadin Ibrahim Gambari da Buhari yayi sabon shugaban ma’aikatan fadar shugaban Kasa

Shugaban Kasa Muhammadu Buhari ya nada tsohon ministan ayyukan harkokin waje Ibrahim Gambari, shugaban ma’aikatan fadar shugaban Kasa.

Gambari mai shekaru 75, ya rike mukamai da dama a kasa Najeriya da waje da majalisar dinkin duniya.

Gambari zai maye gurbin marigayi Abba Kyari da Allah yayi wa rasuwa a dalilin fama da yayi da Coronavirus.

Sarkin Ilori, Ibrahim Sulu-Gambari, ya aika da sakon godiya ta musamman ga shugaban Kasa Muhammadu Buhari, bisa wannan nadi da yayi wa Ibrahim Gambari sabon Shugaban Ma’aikatan Fadar Shugaban Kasa.

A wasikar, Maimartaba Ibrahim Sulu-Gambari, ya ce wannan abu basu aka yi wa ba kawai, an karrama jihar ne gaba daya.