Hukumar SSS ta saki Sowore

Hukumar tsaro ta SSS ta saki mawallafin jaridar Sahara da ke tsare a hannun hukumar Yele Sowore.

An saki Sowore da misalin karfe shida na yammacin Talata a Abuja.

Hakan ya biyo bayan umarnin da Antoni Janar din Najeriya, Abubakar Malami ya baiwa hukumar SSS da ta saki Sowore da Sambo Dasuki.

Idan ba a manta ba a yammacin Talata ne hukumar SSS ta sanar da shirin sakin tsohon maiba shugaban kasa shawara kan harkokin Tsaro, Sambo Dasuki a lokacin mulkin Goodluck Jonathan da mawallafin jaridar Sahara Reporters da duk ke tsare.

Hukumar ta gayyaci lauyoyin Dasuki da Sowore su garzayo ofishinta maza-maza domin cika takardun sakin su.

Hukumar SSS ta tsare Dasuki tun a watan Disambar 2015 a bisa zargin harkallar dala biliyan 2 kudin makamai a lokacin mulkin Goodluck Jonathan.