Amfanin gwamnati, musamman ta siyasa shine samar da farin ciki a cikin mutane masu rinjaye a gari. Ma’ana, ana iya gane rashin ingancin gwamnati idan aka samu akasin haka.
Wasu masanan gwamnati, masu suna David Easton da Martins, sun bayyana gwamnati a matsayin na’aura (system and sub-systems) wacce take da alaqa da bangarori da dama na alkarya (environment).
Talakawa ne suke rayuwa a alkarya din, su kuma shugabanni sune suke rayuwa a cikin na’ura. Ka karanta littafin da gwamnan Kano, Dr Abdullahi Umar Ganduje ya rubuta mai suna (Democracy and Local governments administration in Nigeria.)
Tsakanin ‘system’ da ‘environment’ akwai kyakykyawar alaka ta aiki, misali, ita na’urar, wato gwamnati kenan tana yin abun da mutane masu rinjaye suke so ne ta hanyar samun ra’ayinsu (inputs) sai a canjashi zuwa doka ko umarni da sauransu (outputs) ta hanyar abun da ake kira da ‘feedback loop’. Tasirin na’urar yana bayyana ne a cikin alkarya kamar yin abubuwan alheri.
Shiyasa duk mutumin da yake rike da mukamin siyasa idan kaga yana muzurai ko kama-karya, to yana da karancin ilimi akan mulki da gudanarwa. Don babu dalilin yin haka, saboda mutane ne suka baka aikin yi da quri’arsu don su samu tasirinka a rayuwarsu.
A karkashin haka, ina bawa hukumar KAROTA shawara da tabi a hankali, duk dokokin da zasu yi; su tabbatar suna da alaka da taimakon masu sana’ar adaidaita sahu da kuma jama’a baki daya. Kada mutane su zigaku kuyi abun da yaci karo da rayuwar masu sana’ar saboda son zuciya ko burga.
Daga cikin dokokin wasu sun yi, wasu kuma basu yi ba. Daga wadan da suka yi dadi akwai: Hana kananan yara yin sana’ar, wannan anyi daidai saboda suma masu adaidaita sahun suna qorafi akan haka. Na biyu, sai maganar yi musu shaidar tuki (driver’s licence) da hana su tsayuwa a ko ina saboda rage cunkoso, shima hakan daidai ne.
Amma abubuwan da basu yi dadi ba sune: saka musu haraji mai yawa da kuma cewa ba zasu din ga bin ko ina ba a garin Kano musamman manyan titina saboda gwamnati zata kawo motoci, idan har gaskiya ne, to ba daidai bane don su kansu ‘yan gari da suke zaune a gefunan Kano sai sun ji jiki.
Sannan idan aka tabbatar da hakan, sana’ar sai ta mutu sosai, da yawa daga cikin matasan da suke sana’ar sai sun ajjewa masu baburan kayansu saboda ba zasu iya cin facez ba ko biyan balas.
A matsayin ‘simple random sampling’, na tattauna da wasu daga cikinsu, suke fada min irin halin da suke ciki, misali idan suka fito aiki daga karfe 6 na safe zuwa 6 na yamma, mafi girman abun da suke samu shine dubu 4.
Misali, a cikin dubu hudu zasu bayar da balas 2000 ko 2500, ya zama saura 1500 kenan, a cikin 1500 zasu sha man 1000, kaga ya zama saura 500, a cikin wannan 500 din zaka samu abunda zaka ci kuma ka yi juyen bakin mai duk bayan sati. Sannan ita kanta 4000 ba kullum ake samu ba saboda baburan sun yi yawa a gari.
Akalla za a iya samun mutane sama da miliyan uku a cikin harkar adaidaita sahu. Tun daga masu jan babur zuwa masu gyara da siyar da kayan gyaransa da kuma masu sana’ar wankinsa. Me kake tunani idan aka samu rushewar wannan sana’ar? Na farko dai dole laifuka su karu saboda wasu masu rauni ba zasu iya jure talauci ba, sannan dole a samu karuwar marasa abun yi a gari.
Allah ya shiryar damu.
