Shugaban Majalisar Dattawa, Bukola Saraki ya bayyana wa wakilan jam’iyyar PDP a garin Abeokuta jihar Ogun cewa shi fa ba da wasa yake yi ba a wannan takara da ya fito.
Bukola ya ce ya shirya kayan yakin sa kaf domin wancakalar da Buhari a zaben 2019.
” In rokon ku da ku mara mini baya sannan ku zabe ni a zaben fidda gwani da za ayi ranar 5 da 6 ga watan Oktoba in zama dan takarar shugaban kasa a inuwar jam’iyyar PDP.
” Lokaci ne yanzu yayi da ake bukatar mutum mai karfi a jika ya shugabanci kasar nan kamar yadda yake a wasu kasashen duniya. Na yi abin azo a gani a tsawon shekaru na a harkar siyasar Najeriya wadda a dalilin haka nake ganin nafi kowa cancanta domin cira tutar PDP a zabe mai zuwa.
Shi ko babban kanzagin Saraki sanata Dino Melaye, bayan wakoki da rera kira yayi ga mutanen Najeriya da su tabbata sun wancakalar da Buhari a zabe mai zuwa.
” Kamata ya yi duk mu hadu mu maida Buhari garin Daura can ya koma gida ya huta bayan ya kammala wa’adin mulkin sa na farko.” Inji Dino
Discussion about this post