SIYASA ROMON JABA: Rawar da Hakeem ya taka wa Buhari da APC, kafin a maida shi saniyar-ware

0

1 – Da Hakeem Baba Ahmed aka fara yin fadi-tashin kafa jam’iyyar CPC ta kasa bakiya da ta jihar Kaduna.

2 – Hakeem Baba Ahmed ne ya yi shugabancin jam’iyyar CPC na jihar Kaduna.

3 – Hakeem Baba Ahmed ya taka rawar gani wajen kare muradi da mutunci Buhari a siyasar Arewa da kasa baki daya, a lokacin da Muhammadu Buhari ke takara a karkashin jam’iyyar CPC a zaben 2011.

4 – Hakeem Baba Ahmed ya taka muhimmiyar rawa wajen kafa jam’iyyar APC ‘Maja’ a kasa baki daya.

5 – Hakeem Baba Ahmed ne shugaban jam’iyyar APC na farko a jihar Kaduna.

6 – Ya sadaukar da lokaci da dukiyar sa bakin gwargwado wajen tafiyar ‘Buhariyya.’

7 – Hakeem ya yi rubuce-rubucen kare Buhari a kafafen yada labarai na kasar nan fiye da dubban ‘yan Buhariyya.

8 – Ya sha gabatar da intabiyu ya na maida wa masu sukar Buhari martani a wuraren da wasu suka kasa fitowa su maida raddi a madadin Buhari.

9 – Tun kafin a kai ga kafa gwamnati ‘Guguwar Buhariyya’ ta fara sacce masa tayoyi, aka nisa ana barin sa baya a hanya.

10 – Ya daure an ci gaba da tafiya tare da shi har aka yi zaben Shugaban Kasa na 2015.

11 – Hakeem ne ya kasance Babban Wakilin Muhammadu Buhari a wurin kirga kuri’un zaben 2015 a Hukumar Zabe Mai Zaman Kanta ta Kasa (INEC).

12 – Hakeem ne ya sa hannu a madadin Buhari a gaban Hukumar Zabe, cewa Buhari da jam’iyyar APC sun amince da sakamakon zaben 2015.

13 – Ranar Hayaniya da Hauragiyar Sanata Orubebe a wurin kidayar kuri’a, a Cibiyar Gudanar da Taron Kasa da Kasa, Hakeem Baba Ahmed ne ya tashi ya ragargaji Orubebe, saboda ya nemi ya haddasa rudu a cikin kasa, ganin cewa Buhari ne mafi yawan kuri’u fiye da Goodluck Jonathan.

14 – An bayyana sakamakon zabe, Buhari wanda Hakeem ya kare wa kuri’u daga hayagagar Orubebe ya yi nasara.

15 – An kafa gwamnatin APC har aka gama raba mukamai amma Hakeem ko mukamin goge takalmin Buhari bai samu ba.

16 – Ya hakura da ‘kaddarar siyasa’, ya zauna jiran-tsammani.

17 – Cikin 2017, Shugaban Majalisar Dattawa, Bukola Saraki ya ji tausayin sa, ya nada shi mukamin Shugaban Ma’aikatan Ofishin Shugaban Majalisar Dattawa.

18 – An daina jin Hakeem kwata-kwata a cikin APC ko a cikin gwamnati, saboda an ci birni da yaki, ko tukurun bawa bai samu ba.

19 – Ranar 2 Ga Yuli, 2018, ya yi sallama da APC, ya ce ya yi wa jam’iyyar fitar-zarar-bunu.

20 – Misalin abin da APC ta yi wa Hakeem Baba Ahmed ya yi daidai da dalilin da ya sa Bahaushe ke cewa, “Siyasa romon jaba, ga kitse kuma ga wari.”

Share.

game da Author