Shugaban Jami’ar Baze, Datti Baba Ahmed ya fito takarar shugaban Kasa

Fitaccen dan siyasar nan dan asalin jihar Kaduna Datti Baba Ahmed ya bayyana ra’ayin sa na yin takarar shugabancin kasar nan a 2019.

Datti wanda dan asalin jihar Kaduna, ya tsunduma cikin harkar siyasa ne tun a shekarar 2003 in da ya wakilci karamar Hukumar Zaria a majalisar wakilai a jam’iyyar ANPP. Daga nan kuma sai ya sake koma wa majalisar tarayya din amma wannan karon bayan ya kada tsohon gwamnan jihar Kaduna Ahmed Makarfi a takarar sanata.

Datti ya kafa jami’ar baze dake Abuja sannan yana da wasu kamfanoni da ya dibi matasan Najeriya sama da 600 suna aiki a wadannan kamfanoni.

Datti yayi karatu a manyan jami’o’in da ake ji da su a duniya da ya hada da jami’ar Westminister, dake kasar Britaniya da manyan makarantu kamar su London Business school da Harvard.

Datti ya ce lokaci yayi da matasa masu jini a jika za su dare kujerun shugabanci a kasar nan.