Ba mu da filin da za mu ba gwamnati don kirkiro Burtaloli ‘ Colonies’ – Gwamnatin Taraba

Atone- Janar kuma kwamishinan shari’a na jihar Taraba Yusufu Akirikwen ya shaida wa gwamantin tarayya cewa basu da filayen da za su iya badawa domin kirkiro Burtololi wa makiyaya a jihar wato ‘Colonies’.

Ya fadi haka ne a garin Jalingo da yake ganawa da manema labarai.

Ya ce gaskiyar magana itace mafi yawan ‘yan Najeriya basu san me ake kira Burtali ba wato ‘Colonies’.

” Sannan ta yaya gwamnatin tarayya za ta samo wadannan filayen da take magana akai? Shin zama za ta yi a Abuja ta yanko filayen daga jihohin kasar ko yaya?’’

Akirikwen yace a yanzu haka jihar tana kokarin kafa doka da zai samar wa makiyaya a jihar rigogi don kiwata dabobin su a killace sannan suna sa ran cewa dokar za ta fara aiki daga ranar 24 ga watan Janairu.

” Dokar za ta ba makiyaya ‘yancin siyan filaye domin kafa rigogin su na kiwata dabobin su a killace.”