SUKUK: Gwamnatin Najeriya ta saki naira biliyan 100 domin gina titina 25

0

Gwamnatin Tarayya ya saki zunzurutun kudi har naira biliyan 100 domin aikin gina titina har 25 a fadin kasar nan.

An saki kudin ne a karkashin sabon tsarin tasarifin kudi na Musulunci, wato SUKUK. Za a yi ayyukan ne a karkashin Ma’aikatar Ayyuka, Makamashi da Gidaje ta Tarayya.

Ministar Kudi Kemi Adeosun ce ta bayyana haka a yau Alhamis, a Abuja inda kuma ta damka cakin kudin ga Ministan Makamashi, Ayyuka da Gidaje, Babatunde Fashola.

Dama dai a cikin watan Satumba sai da gwamnatin tarayya ta saki wasu kudin naira biliyan 100, a karkashin Sukuk, wadanda tun cikin makon da ya gabata aka kammala ayyukan da aka yin su.

Adeosun ta ce irin yadda aka karbi tsarin Sukuk hannu bib-biyu daga gwamnatin tarayya, ya na kara nuna yadda ake amanna da tsarin inganta tattalin arziki na wannan gwamnatin a karkashin Shugaba Muhammadu Buhari.

Ta ce za a yi amfani da kudin domin a gina nagartattun hanyoyi har guda 25 a dukkan yankuna shida na kasar nan.

Ta kara da cewa titinan za su kara habbaka gudanar da hada-hadar tattalin arziki a fadin kasar nan.

Ta na mai cewa za a kashe naira biliyan 16.67 a kowane yanki.

Za a gina titina 5 a yankin Arewa ta Tsakiya da Kudu maso Kudu, sannan Arewa ta Gabas, Arewa ta Yamma da Kudu maso Gabas duk za su samu titina hudu kowane.

Share.

game da Author

Leave A Reply